Hamas phu hruaitu a si mi Yahya Sinwar cu Gaza i a um mi Israel ralkap hna kut in a thi cang tiah Israel Foreign Minister nih nizan October 17 ah khan a fehter.
Yahya Sinwar cu nikum 2023, October 7 i Israel dohnak dingah nawl a rak pe tu a si i a tu bantuk in Israel le Hamas karlak raltuknak a hram a rak domh tu kha a si.
Israel Cozah nih Gaza hmunram i an thah mi hi Yahya Sinwar a si le si lo DNA le a ha in chekhlat nak caan saupi an tuah hnu ah a thi mi hi Yahya Sinwar a si ko tiah an fehter hi a si.
A tu bantuk in Israel le Hamas karlak ah kahdohnak kum khat leng chung a chuah chung ah hin Yahya Sinwar cu Israel nih tlaih an duh bik mi minung a si i a tu bantuk in Sinwar a thih mi nih hin Hamas phu caah sunghnak lianpi a chuahpi.
Israel Foreign Minister Katz nih cun Yahya Sinwar kan thah khawh mi cu “ Israel ralkap hna caah lungthin leiin siseh, raltuknak kongah siseh teinak kan hmuh mi a si.” tiah a chim.
“ Sinwar kan thah khawh mi ruangah hin tlaih khih a tong mi Israel miphun zong a rannak in an luat kho mi a si lengah Hamas le Iran nawl ngeihnak a um tilo mi Gaza hmunram thar zong a chuak kho mi a si.” tiah Israel Foreign Minister zung nih cathanh an chuah .
