Chin ramkulh khualipi Hakha thonginn in CDF-Hakha nih an chanhchuah mi hna minung 62 chung in nunchung thongthlak ding tiah SAC kuttang biaceihbawi nih bia a khiah piak mi Nu pakhat le CDF chungtel minung 13 an i tel tiah theih a si.
Hakha Vuan Tu Mawng cerhhmun chak zawn i palik sakhaan ah ramkhel kong he pehtlai in le a ruang tampi ruangah thongthlak mi minung Nu 13 le Pa 49 an zapi minung 62 hna cu CDF-Hakha nih July 20 zinglei slm 5 tluk ah an va chanhchuah khawh hna hi a si.
“Hakha khuachung ah operation kan tuah hi voi 100 leng a si cang.SAC thazaang a der dingin kan tuah hna lai i a donghnak i kan i tinh mi cu Hakha khuapi ningin laak khi a si ko.Palik sakhaan laak zong hi kan i tinh mi chungah pakhat a si ve i thongtla kan chuah khawh mi hna cu an zapi in a him nak an phan cang hna.” Tiah CDF-Hakha president nih Khonumthung ah a chim.
Cu hna chungin Nu Biak Mawi Sung cu CDF hna phaisa na bawmh hna tiin SAC biaceihnak zung nih article 50 (E ) ningin nunchung thongthlak ding tiah bia rak khiah piak mi a si.
Cutin a luat than mi hna chung ah CDF-Hakha chungtel minung 8,CDF-Senthang in minung 5 ram khel he aa pehtlai ruangah tlaih mi minung 30 le a dang dang ruang ah thong rak thlak mi minung 15 an si hna.
Hakha khuapi palik sakhaan tuaitam a si hnu ah khuachung um palik le ralkap hna cu Rungtlang lei ah hmun an khuar i venhimnak zong fek deuh le tha deuh in an tuah hna tiah theih a si.
Hakha khuapi laak khawh nak ding ah hin Rung Operation tiah min bunh in 2023 November thla khan an rak thok i SAC ralhraang minung 30 tluk le an lei ttang minung 10 tluk an thenh hlimh khawh cang hna.
CDF-Hakha nih hin Hakha peng chung i 100 ah 70 tluk an tlaih khawh cang i a tang mi 30% tluk zong laak viar khawh dingin timhlamh nak an ngei cuahmah lio.
