Chin ramkulh Hakha khuami pahnih le Mindat khuami pahnih hna cu kum sau thongthlak ding in bia khiahpiak an si tiah SAC thawng zamh nak Fifty two News nih nihin February 14 ah an thanh.
Mindat khuami Lingkhawke cu dothlennak a tuahtu hna caah eidin pek chanh ruang,dothlennak a tuahtu an si thei ko nain report pek lo ruang le cozah riantuan hna cu sualpur dingin forhfial ruang ti hna ruang ah SAC Upadi section 505 (C) in chanchung thon tla dingin bia khiah piak a si.
Cu bantuk thiamthiam in Mindat khuami Awmlingke cu dothlennak ralkap hna sin ah raltuk training kai ruang,cozah zung hna hrawh le bauh ruang hna ah upadi section 52 (A) in nunchung thontla dingin biakhiah piak a si ve.
Cu lengah Hakha khuami Ngun Lian Thang @Robert le Van Chan Ceu hna cu dothlennak ralkap hna sin ah raltuk training kai le anmah he riantuanti ruangah upadi section 52 (A) ningin rianhraang le thong kum 7 tla dingin biakhiahpiak an si.
Hramhram in uknak laak a si in kum 3 tiang ah Chin mi minung 1,000 leng tlaihkhih an tong i mi cheucu an luat than nain micheubel nihin tiang an luat kho rih lo.SAC nih tlaihkhih hnu in a nunnak a liam mi Chin mi minung 5 an um cang tiah Institute of Chin Affiar-ICA nih February 1 ah an thanh.
