Tatmadaw nih phunghram kan kilven lai i, phunghram ning in rian kan tuan lai tiah an thanh. Cu pin ah naihrawng a chuakvak ngai mi thawngpang kong ah Genral Min Aung Hlaing bia cu nan duh nak ah nan kuaih piak tiah cathanh an chuah.
Tatmadaw nih hmanlio mi 2008 phunghram cu kan kilven lai i, phunghram ning lawng in rian kan tuan lai tiah nihin January 30 ah thanhca thar pakhat an chuah than. Cu leng ah January 27 ah General Min Aung Hlaing biachimnak cu a dih lak in upat piak loin mibu cheukhat, Media pawl hna nih an duhnak ah an kuaih piak tiah an ti.
Tatmadaw lei in Phunghram hrawh lai tibantuk bia chimter mi cu General Min Aung Hliang nih Defense University ralbawi pawl hna nih Phunghram le a sullam an theih fian khawh nakhnga a chim mi a si tiah an chim chih.
1962 kum ah party pakhat system hman ding timh in Parliamentary Democracy ca ah ser mi phunghram cu hrawh a rak si. Cu hnu ah 1988 kum zong ah Multi-party system sernak ding ca ah One-party system a si mi 1974 kum phunghram cu rak hrawh a si tiah Tatmadaw thanhca ah ai tel.
A tu 2008 phunghram cu mipi a dotdot, fimthiam hna le tlangcung ai-awh tu hna telh in kum 7 chung ser mi a si hnu ah rampi ning in duh le duhlo hnatlak lak hnu ah a cang mi phunghrampi a si tiah an thanh chih.
Source: BBC
