Nihin vawleicung ah Nu Prime Minister kumno bik a si i, ram pakhat a hruaitu sinak in vawlei mipi hngalh duh ngaingai mi hi Finland ram Vuancichoh Sanna Marin a si.
Nihin Finland ram hi Nu lawngte nih hruai in ser mi Fonhkomh cozah (Coalition government) an si i hi cozah rian an ttuan chung kumkhat hi an hlawh a tlin ngaingai ruang ah vawleicung ah cuanh cio mi ram le cozah ah an cang.
Finland ram hi COVID caanhar chung ah COVID runvennak kong ah policy ttha tein a ser i, ram a hruai mi an si ca ah COVID runvennak kong ah an fonhkomh cozah cu thangtthat an tong ngaingai.
Finland ram ah a tu bantukin nu hna nih hruai mi cozah le nu le pa karlak thleidannak kong ah tluakruannak (Gender equality) zong ttha tein a au pi i Policy zong chuahpi ai tim mi an si ruang ah vawleicung Gender equality zohtu hna nih an hna an tun hnawh ngaingai mi cozah zong an si fawn.
Sanna Marin hi a luancia August thla ahkhan ruah lo piin khun a dim. Kum 16 khengte a rak i zuldawi mi a tlangval he thitumhnak an tuah. Anpa Markus Räikkönen he Finland nunphung thuam he dawh ngai in thitumh thuam he an thlalak cu Instagram cung ah a hun tar tikah mipi nih Sanna Marin cung ah an hnatunnak le an uarnak a sang ngaingai. A tlangval pa he hin kum 16 chung ah fanu pakhat an ngei (Nitlak nunphung ah thitumh hlan fa ngeih hi a phung ah a cang mi zatlangnun a si).
Finland ram cozah hi ramkhel party panga nih fonhkomh in cozah an ser. Cu vialte party hna cu nu lawngte an si dih. Cu ca ah vawleicung media le social media cung ah caihphai a tong bik mi ah an cannak a si ve. Micheu khat nih Finland cozah cu Nu cozah tiah an hun chim pah lengmang cang.
Kum 34 telawng a si rih mi nu nih Finland ram hruai in vawleicung Prime Minister lak ah kum nobik hun si cu mino hrim nih an uar khun. Finland ram mino vialte ai-awh in ka dir, vawleicung media vialte zong lunglawm tein kan in don hna tiah Sanna Marin nih avoikhatnak bia a rak chim ah a chimchih.
Finland ram ah nu hna nih Hluttaw he ai pehlai mi ah thimfung thlaknak nawl an hmuh hi 1906 kum ahkhan a rak si. Vawleicung ah a hmasabik an si fawn.
Vawlei Ralpi I hrawng ahkhan vawleicung ram tampi hna nih nu le pa tlukruannak hi an rak tuah kho cio lo. Asinain, Finland ram ah cun nu hla nih Hluttaw kong thimfung thlaknak nawl an ngeih hnu kumkhat ah Nu Hluttaw Palai minung 19 an chuahter colh hna.
AD 2000 a hun phak ah cun Finland ram ah a pakhatnak bik Nu President Tarja Halonen an hun thim. 2003 ahkhan apakhatnak Finland nu vuancichoh Anneli Jäätteenmäki an hun thim. 2019 ah cun left-wing party a si mi Social Democratic party in Finland ram ah kumnobik Nu Vuancichoh ca ah Sanna Marin an hun thim tthan.
Sanna Marin nih thlathum tluk Finland ram a hun hruai hnu March 11 ahkhan vawleicung ngandamnak phu WHO nih COVID zawtnak vawlei rai Pandemic tiah a rak thanh. Hi caan theng te ahhin Finland ram ah Sanna Marin hruai mi Finland cozah cu timhcia tein an rak um cang.
March 16 thawk in ramchung ah Lockdown an chiah colh. Vawleicung ralpi II nak lio ah an rak hman mi Zualral Phung (Emergency Act)Upadi in ram a hruai colh. Hi thawng hi Media ah fak ngai in an rak soi nain, Finland mipi nih an cohlan mi hruainak a si.
Sanna Marin le a fonhkomh cozah pali hna cu COVID zawtnak ramchung a luh in Online meeting tuahnak le Online in mipi nih cozah biahalnak tuahkhawhnak, ram mipi sin ah zawt cheknak le siizung zong timhcia tein an rak tuah manh.
Cu ca ah Sanna Marin le a cozah cu Taiwan, Germany le Newzealand cozah hruaitu hna bantukin uar an hun tong colh. Micheu khat hoi hna nih cun COVID zawtnak hi nu hruai mi cozah nih dah an tei khawh deuh tiah an chim len cang.
Finland ram ahhin ram milu 5.6 million hrawng an um i, COVID zawtnak in minung 370 lawng an thi. Milu nuai khat ah minung 60 an thi tiah ruah khawh a si.
Asinain, caan tlawmpal an hun kal ah Fonhkomh cozah chung in party pakhat hruaitu nu pakhat cu an ser mi cozah hruaitu hna he i hmuhthiam lonak an ngei. Cu ca ah a rian in a phuah tak hna. Chikhhat te ah cu party ai-awh in nu thiamthiam an hun thim i, nihin tiang Finland ram ah Nu panga nih fonhkomh mi cozah an ser khawh le an cozah hruainak an kilven khawh.
Nihin vawleicung ram hruainak ah Finland ram hi cuanh ngai mi cozah ah a cang. Vuancichoh Sanna Marin le a cozah hruainak siseh, nu le pa tlukruannak cawlcanghnak kong ah siseh vawlei mipi nih an zoh cho ngai mi cozah ah an cang.
Source: BBC
