Nizaan nai October 6 ahkhan Kalaymyo CNLD ruahnak petu a simi Pu Khua Tuah Lal cu CNLD Party ruahnak petu sinak in kai din cang tiah cathanh a chuah. Hi kong he pehtlai in thawngfian khawhnak ding ca ah tiah CBN News nih Kaphnih chimrelnak le biahalnak kan ngeih hna.
Chuahnak ca a tialtu pu Khua Tuah Lal nih cun, “CNLD policy hi ka duh lo. Democracy Federal kan duh tiah an ti. An Chairman Pu Ngai Sak le No Than Kap tu hna cu Democracy le Federal kong chimphuannak hmun ah meekuang hung loin pyine ah meekugn an hung. Cu ruang ah ka duh lonak a si. Kalawng men in chim nakin tuahsernak in riantuan ka duh ruangah ka chuahnak a si” tiah CBN ah a chim.
Pu Khua Tuah Lal nih CNLD party ruahnak petu le party chungtel sinak in a chuahnak ca a thanh nak ca ah “a ruang tampi ruang ah” timi in cathanh a langhter. Hi kong ah hal chap a si nain caan pek khawh lonak in a kan leh.
Kalaymyo peng CNLD party Secretary a simi Pu Chan Lian Nih cun, “Pu Khua Tuah Lal hi a hlan CPP lio ah arak um bal mi a si. 2015 timnak ahkhan Falam peng in thimnak cuh ding ah min ai pe i a sung. Chin Party pathum fonh ah party ahkhan a min a rak um ti lo. Cu tikah EC zong ah telh asi tilo. Zeihmanh ah ai tel tilo. Party pathum EC pathum kan ifonh hnu ahkhan Ruahnak petu tal ah kan thim hau tiah kan thim. Cu hnu te cun meeting a chuak tilo.” tiah CBN ah a chim.
Pu Khua Tuah Lal hi Sagaing Ramthen Chin Affair Minister hmunhma ah a rak i cuhnak kong he pehtlai in lungtlin lo ruang ah chuah dawh a si tiah an chim.
“Sagaing CAM Candidates ah min a rak i pe. Hi lio ah CNLD CEC nih ca an chuah mi hmu lo in an mah tuah in CAM Candidates thimnak a rak um. Asinain, Party CEC nih cathanh an kong thil an hung hal tikah CEC nih CAM cu thim siseh timi in lungtlinnak an tuah i, CEC nih an auh hna hnu ah CAM Candidate thim a si. Pathum an kal i, pahnih an sung. Hi Chung ah pu Khua Tuah Lal hi a sungmi pahnih lakah pakhat a si. Hi hnu hin party kong zong ah ai thlak tilo. EC chungtel zong asi lo tikak meeitng zong a kai lo. Keimah hmuh ning ah EC zong thim lo a si tikah party cawlcangh nak ah ai tel tilo tiin ka hmuh. Cun hitin chuahnak ca a tial mi hi tial zong a va herh lo nain, Party thangchiat duh sawhsawh a si tiin kan ruah” tiah Pu Chan Lian nih CBN ah a chim.
Sagaing ramthen CAM Candidate a simi Pu San Thawm Thang nih cun, “CNLD Party phunglut member a rak la lo. Pu No Than Kap he zong an i rem lo. Hi kong zong ah a si kho. Pu Khua Tuah Lal hi CAM Candidate hmunhma hi rak ngah sehlaw party in a chuak lai lo tiah ka ruah.” tiah CBN News ah a chim.
