Chin ramkulh ah a hmasabik theih hmasa a si mi ramchung siizung riantuantu hna rian dinhnak ah ai tel mi cu Falam siizungpi a si. Ihkhun 200 a tlum mi Falam siizung sibawi hna cu rian an i din chung cang lai.
Ralkap nih February 1 ah uknak an lak ruang ah ralkap cozah kuttang ah rian kan tuan lailo tiah Falam siizung siibawi te nih thanhca an chuah cang. An cathanh cu a tanglei bang hin a si.
Upat mi ramchung ngandamnak riantuan tu vialte hna, Democracy phunglam in thim mi cozah le mipi ai-awhtu hna cu hriamtlai phu hna nih tlaih in rampi uknak tungtlang pathum an lak pin ah ningcang loin uknak an lak cang. Hramhram in ralkap uknak a kal khawh nakhngak tiah Union cozah thar cu mipi duh lo ning in an ser cang.
Cu ca ah kan nih Falam khua in ihkhun 200 tlum mi General Hospital siibawi hna nih uknak a la tu ralkap cozah tang ah rian kan tuan lai lo i, kan duhnak kha dai tein kan langhter lai. Civil Disobedience Campaign ah thaizing 3 February 2021 thawk in kan i tel lai tiah thawng kan in thanh hna.
Myanmar ramkomh chung ah a um mi ngandamnak riantuantu vialte hna zong nih zapi kan i tel naklai kan in forhfial hna.
tiah thanhca cu nihin zaanlei ah an chuah cang. Atutiang ah ramchung siizung 30 lengkai hna cu rian kan tuan lailo tiah thawng an thanh cang.
