Chin ramkulh,Falam khuachung bank hna ah nai hrawng cikua in phaisa chuahtu an tam ngaingai tiah theih a si i voi khat chuah ah phaisa sing 10 lawng chuah khawh a si.
Falam khuapi laak kahdohnak a chuak lai timi thawng a len hnu in a tu bantuk phaisa an chuah cio hi a si.a luancia zarh khat tluk khan Falam khuapi um KBZ bank le Myanmar economic bank hna ah phaisa pehtlai in an chuah hna hi a si.
“A bu in phaisa chuah a si in ni 3 chung tluk kha cu duh zat chuah piak a si.a tu cu voi khat chuah ah sing 10 lawng chuah khawh a si.cu hmanh cu zarhkhat a hlankan in bank cauk va chiah a hau.Voikhat phaisa chuah nak dingah zarh hnih kan rau” tiah khuami pakhat nih a chim.
A luancia May thla dongh lai ah khan Chinland Council ralkap hna nih Tonzang le Cikha khuapi an laak in caan rau lo te ah Tedim khuapi cu Chin brotherhood ai timi PDF Zoland le CNDF nih doh hram an thok ve caah tlawmpal ah falam khuapi ah kahdohnak faak a chuak kho mi a si caah a tu bantuk in bank ah phaisa an chuah cio hi a si.
Falam khuapi chung khuasa mi cheukhat zong kahdohnak a chuak sual lai ti phang in ral a hrial mi an um cuahmah cang tiah theih a si.
A luancia May 31 ah khan Falam khuanu khuapa hna nih khuami an auh hna i meeting an tuah pi hna hnu ah Falam khuapi cu chuahtaak lo dingin biakhiah nak an ngei tiah theih a si.
