US House of Speaker Nancy Pelosi nih VP Mike Pence cu President Trump White House in thawl ding ah a hnubik namchan nawlnak an tuah cang.
A luancia zarh chung ah US Congress innpi buaibainak ser ruang ah President Trump cu US President si ding ah ai tlak lo timi US phunghram 25th Amendment ning in White House in Trump thawlnak cu Democrats party nih an zuam cuamah cang.
Hi namchan nawlnak an tuah mi cu VP Mike Pence nih a hnon piak hna lai tiah ruah a si. Kam khat lei ah President Trump cu Democrats party nih biatak tein an dohdalh i, Republican party chung zong in a dohdal tu an karh ngai ti a si.
President Trump cu Social media tampi an baar ruang ah mipi sin ah cathanh pa ngai a tuah lo. A rauh hlan Januarty 20 ah White House in a ttum cang ding a si.
A tu ah Ms Nancy Pelosi nih Mr Pence sin ah Trump phuahnak ca a tial mi cu House ai-awh in phung a lut lai. Thaizing (Cawn nihnih ni) ahhin House in vote an thlak lai tiah ruah a si. Cu vote an thlak tikah Trump phuahnak kong ah House lei nih Mike Pence le cabinet pawl cu suimilam 24 chung caan an pek hna lai.
“Biapi tak in kan cawl ding mi hi a si. A ruang cu hi president pa nih hin kan ram democracy tlirhkhuanhnak fak pi a tuah ca ah action kan lak colh a hau” tiah a tial chih.
Republican lei in Pensylvania ai-awh senator a si mi Pat Toomey le Alaska lei in Lisa Mukowski hna nih cun, “president Trump hi a si khawh ahcun a tuanh khawh chung tuan in ai phuah i, a kal zokzok a hau” tiah an chim.
Mike Pence Nih Democrats Halnak Hnong Sehlaw Zeidah A Cang Lai?
VP Mike Pence nih Democrats lei halnak a hnon a si ahcun Impeachment timi President sual kawlnak an tuah lai. Congress chung ah President Trump cu sual kawl a tlak maw tlak lo tiah bia alnak le vote thlaknak an tuah lai. Congerss chung ah Impeachment kong hi zarh cheu hrawng ah an lim lai tiah lawmakers pawl nih an chim. Congress cu Democrats tamnak a si ca ah an hlawh a tling lai tiah zumh a si. Cu ca ah President Trump cu US tuanbia ah voihnih tiang impeachment tuah mi a si telai.
Congress nih an rian an lim tikah Senate ah an caih than lai. Senate palai cheuthum cheu hnih nih an lung a tlin ahcun President phuahnak lam ai hung telai. Asinian President Trump a rian a dinh ding ah ni tlawm telawng ai duh cang mi hi Senate nih caih phu ah an ruat telai lo i, Biden le a cozah kong tu ah an lung a um deuh telai ti a si.
Senate ah Republicans Senators pawl nih Mr Trump impeachment tuahnak ka lung alting ko tiah vote ka pek lai a ti mi pakhat hmanh an um rih lo. US ram thencheunak tu a chuahpi lai tiah Republicans senators pawl nih cun an chim.
President elect Joe Biden nih cun Impeachment hi Congress biakhiahnak a si tiah a chim. Asinain a nolh chap mi cu, “President Trump hi US President tuan ding a rak i tlak lonak a rak sau tuk cang ee” ti a si.
Source: BBC
