Salai Aung Ling Daituii
Democracy timi cu tawifiannak bik in a sullam kan leh ahcun mi tam-u duhnak in hruaimi le uk mi tiah sullam a ngei. Cu ca ah Democracy uknak phung a hmang mi vawleicung ram pawl ahhin miphun in milu tlawm, biaknak in milu tlawm miphun pawl hi Democracy tlangtar pi tang ah mitampi namnetnak an tong zungzal.
Milu an tam ruangah MP palai pawl an tam i, MP palai a tlawmmi miphun pawl, biaknak bia mi pawl kha upadi ning tein an chilh iap dih hna. Cucu Tyranny of Majority tiah an auh.
Cu ca ah mitlawm-u miphun an umnak ram paohpaoh ah Democracy ukphung an hman tikah miltawm miphun pawl chilhnak um lo nak hnga le kilvennak ca ah tiah phungser, ningcang siam hnu ah Democracy timi phung cu hman a si tawn. Cu lawnglawng ah cun tryranny of majority cu kham khawh a si. Federal timi cu cubantuk phungsernak ca ah a tha bik cem ningcang (system) hna lakah pakhat a si.
Cu ca ah Democracy kan ngah hnu ah Federal kan ngah telai timi hi lingtelet ruahnak a si. Democracy le Federal timi cu hmunkhat te ah laktti dingmi thil a si. Cu lo ahcun, mitam-u pawl nih chilhchih nak kha nawlpek he aa khat.
Democracy ngahnak ding ca ah Phunghram remh a herh. Federal ngah nak ding zong ah phunghram remh a herh. Democracy ngah hnu ah Federal a timi pawl hna hi Phunghram voihnih remh a duh mi hna an si. Federal a duh hmasa mi pawl hna hi phunghram voikhat remh ai timmi an si ve (phunghram remh tikah Federal le Democracy remh a si colh). Voikhat ah lim dingmi kha voihnih ah tuah i timh ding a si lo.
Mitlawm miphun a nannet tu khamnak ding Federal tel loin Democracy timi cu mitlawm miphun pawl namnet ding ah nawlpek a si ko. Cucu tuanbia nih tehte tampi a ngeih. U Nu nih Buddhist biaknak kha rampi biaknak ah siseh tiah a rak chuahpi lio ah Kachin MP le Chin MP nih an rak doh tuk nain an hlawh a rak tling lo. Cucu General Aung San nih a rak chimmi ningcang a si lo. Aung San nih a rak chimmi cu kan ram hi “secular state” siseh a ti. Panglong thinlung a keng lo tiah an rak doh tuk nain, mee an thlak tikah an sung diam.
Cucu Parliamentary Democracy chan ahkhan a si. Democracy ukphung kan rak hman lio ah kha kha a rak cang. Tehte tha ngai a si.
Nan zumh lo ahcun a tu lio ah i al cuahmah mi Kalay University ai saknak Khaikam vawlei (Chin ramkulh vawlei) khi Chin ramkulh ah maw Sagaing ramthen ah maw kan chiah lai tiah Hluttaw ah mee i tthen hmanh seh. Zeitik hmanh ah Chin MP pawl nih an tei kho hna lailo. Mipi thimmi MP nih an tei lailo. Sagaing ramthen nih a tei hna lai.
Atu Htilin le Mindat an i cuh cuahmah mi khua khi Magwe ramthen ah maw, Chin ramkulh ah dah tiah mee tthen hna seh. Tatmadaw tello mee pek cun zeitik hmanh ah Chin MP nih an tei hna lailo. Chim duhmi cu Democracy uknak timi cu (mitlawm u miphun pawl khamhnak ca ah serchih lo ahcun) mi tam-u nih mitlawm-u kha a chilh chih peng ko hna lai.
Tukar hrawng ah Democracy hnu ah Federal timi a chim mi an tam ngai te. Zumh lo ding ah a biapi taktak. Cuti a si ah, Democracy maw a herh hmasa deuh Federal dah tiah cun; AN PAHNIH NING TEIN, HMUNKHAT TE AH TUAH/LAK/SER DING AN SI.
(Hi capar hi Salai Aung Ling Daituii nih Kawlca in a ttial mi a si i, CBN nih laica in ai tlak ningin kan lehmi a si_ Editor.)
