Tanintharyi ramthen,Dawei peng Thailand-Myanmar ramri ah a um mi SAC Mawhta sakhaan um SAC ralhraang hna nih an sakhaan an chuahtak caah KNLA le PDF hna nih sakhaan cu an laak i meithal zun 34 le kuanzen hna an laak.
Aluancia April 23 ah khan KNLA hruaimi dothlennak ralkap ttangti phu hna nih cu sakhaan cu doh hram an rak thok i kaphnihkar kahdohnak tlawmpal a chuah hnu ah SAC ralhraang minung 40 tluk nih an sakhaan cu an chuahtaak i dothlennak ralkap hna nih nizan April 24 ah khan sakhaan an laak khawh hi a si.
“Sakhan ah a um mi SAC hna nih an Sakhaan an zaam tak caah sakhaan cu fawizaang tein kan laak khawh,an hriamnam zong an chiahtak i an sakhaan zong cu thenhlimh nak kan tuah khawh cang” tiah PDF thawnghram pakhat nih a chim.
Cu sakhaan Myeik hrambunh SAC LIB 17 battalion ralhraang hna hmunhma an laak i kahdohnak chungah hin SAC ralhraang a thi mi zong an um kho i tam deuh cu an zaam hna tiah theih a si.
Mawhta SAC sakhaan cu KNLA le ttangti phu hna nih an laak khawh in SAC lei nih vanlawng in bomb a rak thlak len tiah kan theih.
