Aralai mi December thlachung ahhin cun COVID-19 khamsii phunkhat asiloah cu nak tam zong serchuah khawh a si lai tiah ruahchan a si.
Atulio vawleicung ah COVID khamsii ah hmaisuang bik a kal mi hna hi US ram Company pakhat BioNTech nih an ser cuahmah lio mi Pfizer, UK ram ah minthang Oxford University nih an ser cuahmah mi Astrazeneca le US ram tthiamtthiam in Moderna timi COVID khamssi hna hi an si.
Pfizer timi khamsii hi tuthla October dongh lei ah a dotthumnak hneksaknak (phase three trial) a phichuak an thanh lai. Oxford/Astrazeneca hi December thlachung ah a chuak ve lai. Moderna khamsii hi November thlachung ah phase 3 trial result a chuak ve lai.
Thawngpang ttha ngai a si tiah an ruah mi cu Oxford/Astrazeneca hi khamsii chuahnak ah a rang deuh ngai kho ti a si. A ruang cu UK ram ah mizaw an karh deuh i, khamsii hmual a ngeih le ngeih lo aa hngal kho deuh ti a si.
Thawngpang ttha lo pakhat tiah ruah mi tu cu, a cunglei ah langhter mi khamsii pathum hnu ah a zultu Jonhson&Jonhson timi khamsii hi an hneksak mi minung pawl sin ah theih lomi zawtfah nak a chuah ruangah an ngolter chung hna.
Hihi kan hnu Oxford/Astrazeneca an hneksak lio zong ah a rak cang bal. Asinain, a zalong mi siichek tu mibu nih an rak chekpiak hna hnu ah an onh tthan hna ti a si. Jonhnson&Johnson timi khamsii hi voikhat lawng chunh ding mi khamsii a si ruang ah mi nih an uar ngai te.
Khamsii pawl chuahnak kong ah a biapi bik mi US ram FDA nih lakhruak khamsii chuahnak kong ah EUA cu guidline pakhat a pek. A sullam cu khamsii pakhat khat a chuah ahcun FDA zong nih mipi sinah chunh dingin nawlpeknak (approved) a tuah colh khawh ding dirhmun a si. FDA nih a cohlan cang mi khamsii pawl hi cu zumhtlak khamsii an si cang ti khawh a si.
Asinain, a khamsii taktak ngah khawhnak ding ca ah hin caan a rau kho ti a si. A tu an guidline ning in khamsii chunh hnu ah a tlawmbik thla 2 chung hngah ding timi a um. Thlahnih hngah hnu ah zeihmanh a can lo ahcun hman taktak ding ah zumhtlak khamsii a si lai tiah a um ve.
Asinain, Oxford/Astrazeneca an chuah nak UK ram ahhin an mah tein guidline an ngei ve. FDA siseh, EUA siseh, UK siseh an pathum in hman ding ah a ttha cang an timi hi cu zumhtlak khamsii a si kok ti a si. Cu ca ah November thlachung ahhin cun Pfizer/BioNTech khamsii hi a hlawh a tling kho bik ding ah zumh le ruahchan a si.
Tuluk ram ah Sinovac, CanSino, CNBG timi COVID khamsii pawl an chuah cuahmah ve hna. Sinovac le CNBG hi Novermber thla ah dotthumnak hneksaknak phi an chuak ve lai. Russia nih an ser ve mi Gamaleya le Sputnik V timi khamsii pawl zong hi November thlathawk ah dotthumnak result aa thei ve lai.
Russia nih zeitluk hmanh in kan tuah khawh ti hna sehlaw hmaithla ceo ahhin an result a chuak ve ding a si. Asinain, Egypt ram ah cun Russia nih COVID khamsii cu a kuat ve cang. India nih hin Tuluk sii hi ram mi tampi sin ah hneksak a sianh lo. Tlawmte lawng hneksak seh a ti.
US President Trump nih November thla nikhat ah COVID khamsii chuah ding planin ai suai mi hi hlawhtlin lo dawh a si. Asinain, FDA guidline cung in Trump nih nawl a ngeih khawh mi a um. US Healh and Human Services (HHS) hi Trump nih a rian a phuah khawh mi a si.
Cu ca ah US nih COVID-19 khamsii kan chuah khawh cang timi thawng an thanh ding hi November le December thla ah a si lai tiah a fiang ngai ti a si. FDA le EUA nih nawl onhnak (approved) hi December thla ah a si kho. A tuan lei ah November thla dih hrawng.
EUA nih COVID-19 khamsii chuah ding nawl an pek hna cangka in ngandamnak riantuantu pawl kha hawi hlan bik ah chunh an si telai.
Theih awk: Khamsii chuahnak ding ca ah caan a rauh tertu thil pawl an um ve. Tahchunhnak ah Oxford/Astrazeneca hi nu nih nau an pawi tikah nau ah aa cang dingmi thil (Embyonic cell) hman a si. Cu ca ah cubantuk cell pawl tam pi hmuh khawh nak ding ca ah thil har ngai a si ve. Cu pin ah khuhsi zong an hman fawn tikah Khuhsi a man ngaingai fawn lai.
Cu ca ah COVID-19 khamsii kan ti lengmang mi hi hlawhtling ngaingai in vawleicung ah i chunh khawh nak ding ca ah 2021 kum hrawmthawk in a kum canceo tiang cu caan a la te ko lai. Coronavirus chawnhbarh lonak ding ca ah a control kho dingmi khamsii i chunh ding ah cun ram pakhat i milu 50% hi chunh an hau lai tiah ruah a si.
Source: Richard Myo Thant
