CBN News, 15 Oct 2020: Myanmar, a hlei in Yangon khualipi ah cinthlakmi tisik anhnah man hna cu cuhlan zuarnak rate let in an kaih viar tiah Myanmar cinthlaknak lei tawlreltu MFVP secretary U Kyaw Thu nih a chim.
Yangon market i zuarmi tisik anhnah pawl hi Shan state in lâkmi deuh lawngte an si hna, Shan State in Yangon lei phurhnak ah Truck mawngtu hna cu voi 2, Shan State le Yangon luhlai ah Covid-19 test nak ngeih ta an hau.
Covid-19 test man hi Driver pakhat ah Ks 40,000 a si, Shan State le Yangon i test nak ah Driver 1 ah Ks 80,000 liam a hau, hi an liammi hi tisik anhnah an phurhmi man nih an cover ter ve tik ah tisik anhnah Yangon an vun phanhpi mi cu man fak deuh in zuar lo awk a tha tilo.
A hlei in, Aalu, Piat, Daidim, carrot, tomato, parbawr, aithing, antam, thakbere, bawnbawk hna cu September thla dongh thawk in a man kaih hleimi an si.
Cu hlan ah aalu Ks 900 in Shan state ah an va lakmi cu Yangon ah Ks 2,000 in zuar a si, Tomato Ks 300 in rak lak tawnmi zong Ks 2,000 deng ah kaih a si, Shan State ah parbawr pakhat Ks100 or 150 in an va lakmi cu Yangon ah Ks 600 in zuar a si cang.
Yangon Thiri Mingalar Market ah hin cuhlan ah cun nikhat ah Truck 300 peng nih Shan State in tisik anhnah an vun ngalh tawn, a sinain Covid-19 hnu ah cun nikhat ah Truck 50 hrawng lawng nih tisik anhnah an vun ngalh khawh cang.
U Kyaw Thu nih a chim ning ah Yangon tisik anhnah zuarning man hi cozah lei nih a man felfai te in a kan khiah piak zau lo ah cun mipi ‘customer‘ lei ah harnak tampi a um lai tiah a chim.
CBN News
