Australia ram Victoria ramkulh ah zahan zaan zaantim thawk in inn khat le inn khat i lenkai khawh a si cang lai. Nikhat ah voikhat lawng i lenkai ding a si lai i chungkhar dawng khat in upa 2 le ngakchia hna he i lenkai khawh a si lai.
Lengchuah khawhnak a ruang 4 um ti loin zeitik caan poah le zei herh caan poah ah lengchuah khawh a si cang. Asinain, 25km chung lawngah umkal/chawhleh khawh a si.
Lakphak dawr, rawl dawr le zu dawr pawl zong on an si cang. Asinain, hmun lengah minung 50 tiang le inn chungah minung 20 tiang lawngin a si lai.
Thil dawr, tamhnak dawr, takpum zohkhenhnak dawr pawl zong on an si cang. Kum 18 tangka ngakchia/mino pawl caah khualeng lentecelhnak zong tuah khawh a si.
Gym le laam cawnnak pawl zong khualeng ah minung 10 tiang tuah khawh a si. A lengah ummi ti-lionak ah minung 50 tiang kal khawh a si.
Biakinn lengah minung 20 tiang tonpumh khawh a si i biakinn chungah 10 tiang pumh khawh a si. Thitumhnak ah minung 10 tiang in le, thihloh ruakhumh/thlahnak ah minung 20 tiangin tuah khawh a si.
November 8 hnu cun atu ning tein zawtnak hmuhmi a zor thluahmah ahcun phihkhamnak pawl cu dorh deuh lengmang an si lai i milu rikhiahmi zong kaih thluahmah an si lai.
Asinain, lengchuah tikah hmai-huh cu hmai kum tiang khi cu hman peng a herh lai tiah Premier Andrew nih a chim.
Ref: DHHS, 7 News, Premier of Victoria
