Ralkap luzik General Min Aung Hlaing nih rampi uknak a lak hnu in a ser mi State Administration Council chungtel sinak ah sawm kan si ahcun kan i tel lailo tiah CNLD General Secretary Salai Ceu Bik Thawng nih a chim.
Mipi thim mi cozah sin in uknak a lak hnu in ralkap nih a thar an ser mi ralkap cozah nih tlangcung party le rawn party cheukhat hna cu a sawm ngaingai hnati a si. Ralkap lei in sawmnak an kan tuah zong ah kan i tel lailo tiah Salai Ceu Bik Thawng nih a chim.
A tu tiang cu phung ning in sawmnak a um lo nain, pumpak in an sawm hna le hna lo cu kan thei lo. Zung ah ca a phan lo. Party dirhmun in cun cohlan awk a tha lo mi thil a si. A ruah hrim kan ruat lo tiah Salai Ceu Bik Thawng nih Khonumthung News ah a chim.
Chin miphun ai-awh party pakhat a si ve mi Asho Chin National Party cu ralkap cozah nih an sawm ve hna nain kan i tel kho lo tiah an al cang hna.
Source: Khonumthung News
