“Chin” timi kan miphun min in kan i funtom kho bal lo. Chin mi Baptist khrifa bu a simi paoh nih funtomnak rak ngeihmi cu “Chin” min in si loin “Zomi” min in “Zomi Baptist Convention (ZBC)” tiin kan pa le nih an rak dirh i kum saupi kan rak i funtom. A si nain Chin mi theu cu Baptist biaknak pakhat aa hrawm mi hmanh kum saupi kan i funtom kho lo. 1995 ah ZBC cu pahnih ah a kekkuai. Kan unau Tedim, Tonzang nih Zomi Baptist Convention of Myanmar tiin a dang in an chuah. A hnu ah ZBC cu CBC (Chin Baptist Convention) tiah a min thleng a hung si. Chim duhmi cu Chin miphun vialte a huapmi zei bantuk a phu (organization) hmanh kan ngei kho lo.
A si nain CNDP, CPP, CLD hruaitu hna le party member hna dihlak khua ruah kho nak, miphun dawknak thawngin CNLD party cu dirh a hung si. Chin miphun huapin lungrualnak a duhmi paoh nih CNLD nih Chin mi a kan funtom kho bik ti hi kan lung hmuihding le kan i lawmh cio ding, kan don(welcome) cio ding a si. NLD le USDP le party dangdang tha a pe mi hna zong nih miphun mit in nan lung a hmui ve ko lai, nan lung a tling ve ko lai tiah beisei nak ka ngei.
Chin miphun pakhat kan sinak ah hnursuantu a phunphun kan ton. Kan unau Tedim lei nih Chin an i ti duh ti lo. Zomi timi cawlcanghnak (movement) a thawng, a dangdang pengtlang ttanhnak a phunphun a karh. Hi bantuk boruah le miphun kong hnursuannak a tam lio ah Tedim le Tonzang myone ah CNLD biatak tein an cohlan i an dirhpi mi hrimhrim hi zeitluk in a sunglawi.
Cu lawng hlah. Peng dangdang ummi kan unau hna nih CNLD Thantar (flag) in Chin mi kan si tiin CLND an dirhpi. Rakhine state ummi Mro, Sumtu, Magwe region ummi Asho Chin, Sagaing region ummi Thado Kuki hna zong nih CNLD ah an rak i funtom ve. Hi bantukin Chin miphun chung ah lungrualnak le funtomnak hi kan hmu kan ton bal lo. Hihi kan miphun caah tuanbia thar a si. Tuanbia tha zong a si. Miphun a daw mi paoh nih cun kan lung hmuih ding le kan i lawm cio ding a si. A bik in kan mino hna nih biatak tein ramkhel lei ah thanphorhnak an hung ngeimi hrimhrim hmuh tikah kan miphun a him cang lai timi ruahchannak nganpi a ka ngeihter.
Falam CNLD mino hna le Hakha CNLD mino hna nih lungrual tein khuate lei an tlawnti, timhmi pakhat ah an dirti mi hmuh hrimhrim cu lung hmui, lung a diriam. A luan cia kum 1 kum 2 hrawng ah FB comment hna ah bia chiakha in a khat mi zong hmuh awk a um ti lo. Mah hi pei miphun lungrualnak cu a si cu. Miphun kan lungrual ahcun kan miphun kongkau cu hna a ngam ko, kan hmaithlak mi le kan i timhmi cu kan hmu te ko lai. DASSK ah va funtom mi nakin kan mah kan miphun te ah kan i lungrual mi le kan i funtom mi hi a za diam ko.
Thaizing election result cu zei a va si zong ah kan i funtom nak le kan i lungrualnak cu thawng chinchin seh. Chin mi kan dihlak kan biak Pathian nih kan umpi hram ko seh.
Kalawm
Pa Hmun
Australia
