CBN Sport News, 15 Oct 2020: Neymar cu Brazil caah goal thun tambik changtu pahnihnak a si cang, a cung ah Legend Pele lawng a um cang. Nizan zingka South America World Cup qualifier chuihnak ah Neymar ruahning lengin a cawlcangh a tha, 4-2 in Peru lak ah Brazil teinak a hmuhpi.
Paris St Germain forward Neymar hi an ram caah puai 103 a chuih cang i goal 64 a thun cang, hmaikal ropui Ronaldo (goal 62) a lehpel i goal 77 thuntu pele lawng a cung ah a um cang. A tu ah kum 28 lawng a sirih i tlawmpal ah ‘King of Football’ tiah auhmi pele zong a lehpel khawh colh zumh a si.
Neymar goal
Nizan zing Estadio Nacional del Pery i an chuihnak ah minute 6 chung ah Peru lei, Andre Carrillo nih goal khat a thun i half time i dinh hlan ah Neymar nih panelty in 1-1 in cham colh ve.
Peru lei nih hmai an vun nawr than, minute 59 nak ah Peru lei Renato Tapias nih a hlatnak in Longshot in a chaih i 1-2 in Peru lei nih hmai an hruai, tlawmpal ah Brazil lei Everton forward Richarlison nih goal a thun than i caan dongh lai tiang ah an chuih ning an i tluk ngai.
A sinain Minute 80 hnu ah Peru lei an i nawnnawk, Peru lei Defend Carlos Zambrano nih Neymar a pahtluk ruangah Panelty a cawi, Neymar nih Panelty in goal a thun than, Defend Zambrano thiam thiam nih hin Richarlison a vom nam ruangah Red Card in chuah ai huah.
Peru lei nih goal thun than tim in thazangthar an chuah nain an ttan tuknak ah an i chuahsual, Peru Goal bawh pakhat Carlos Caseda cu bench (mandat) ah um hmanh selaw a umtu zia aa dawhlo tuk ruangah Red Card pek ve a si. Caan dongh lai ah Neymar nih goal khat a thun chap than.
Goal 64 a thun cang
Brazil ram caah goal thun tambiktu Pele hi an ram caah puai 92 a chuih i goal 77 a thun, Ronaldo hi an ram caah puai 98 a chuih i goal 62 a thun, Neymar hi puai 103 a chuih cang i goal 64 a thun, Neymar hi an ram caah a chuih rih lai.
Brazil hi November 12 ah Venezuela he an chuih than lai, Venezuela hi puai 2 an chuih cang nak ah teihmi an ngei rih lo, Goal 4 in an sungh rih ruangah Neymar caah caan tha, goal thun chap a fawi lai.
CBN Sport News
