CBN News, 03 Oct 2020 : Hong Kong palik hna nih nizan cawn ninga ni (02 Oct 2020) ah khan China National Day ni i tapeih hmohnak lam zawhtu, tanhtu minung 86 an tlaih hna.
Hong Kong palik zung lei nih an chim ning ah lam zawhtu Democracy tanhtu hna hi Cozah nih a khapmi a bu i i pumh lo ding nawlbia an buar i voi zeimawzat thawl an sinain nawl an ngaih lo ruangah tlaih an si tiah an chim.
An mi tlaihmi hna lak ah hin Distric councillor minung 4 an i tel.
Nizan i lam an zawh dingmi hi online in sawmnak rak tuah a si, Hong Kong i Causeway Bay Shopping distric ah minung i hngahnak an ngei i Palik cawlcangh ning duhlonak le Democracy uknak an duhnak an aupi, Hong Kong cozah nih Cozah dohnak auhla ah a ruahmi le a khap mi ‘Liberate Hong Kong, Revolution of our time’ timi cu mipi nih an aupi.
People’s Republic of China dirh camphak, National Day hi Hong Kong ah cun China Cozah duh lonak langhternak ni ah an rak hman tawn, kan hnung kum 2019 thawk khan Hong Kong le Mainland China cozah thithruaining duhlonak langhternak tharthawh than a si, hi ruangah China nih Hong Kong i cozah duhlonak langhtertu hna khamnak ah National Security Law thar a ser i tu kum June 30 thawk in cu Law cu hman hramthawk a rak si.
Hi National Security Law hi Hong Kong mipi le vawleicung ram cheukhat hna nih Hong Kong mipi diknak le an covo zeirel piaklonak ah an ruah, hi Law thar ruangah US nih China le Hong Kong karlak ah phikhamnak phun phun arak tuah cang.
CBN News
