Chin ramkulh chaklei Hakha khualipi le Magway ramthen Gangaw khua pehtlaihnak lampi cu a rauhhlan ah kan on (Hun) than lai tiah Yaw Defense Force –YDF in rianngeitu Ko Myat Thu nih a chim.
“Hi lam phih a si mi hi YDF ralkap pahnih tlaih an ton mi kong in hram aa thok ti khawh a si. a ruang theih lo in kan ralkap 2 cu CNA nih an tlaih hna.nizan July 10,ah khan CNA ralbawizik nih thaizing kan thlah hna lai a kan ti.nihin ah kan i chawn than i nihin (July -11) cu a tlam tlin deuh lo caah thaizing ah kan thlah hna lai a kan ti than.lam cu a rauh hlan ah onh than a si ko lai.” tiah Ko Myat Thu nih cun Khonumthung ah a chim.
Chin ram le Magway ramthen a bik in pehtlaihnak lampi a si mi cu lampi cu Gangaw in a chaklei Saidu khuate pawng i Hakha lampial in YDF nih a luancia July 8 in an phih caah a tu hi motor 70 leng aa taap tiah theih a si.
Yaw Defense Force- YDF ralkap a si mi Ko Aut Thein le Ko Aung That Khaing hna cu a luancia July 7 ah khan CNA nih gangaw peng Zawknak khuate pawng ah an rak tlaih hna i a thaizing July 8 thok in YDF nih lam an phih hi a si.
