Chin ramkulh, Tonzang khuapi um SAC sakhaan cu Chin National Army – CNA hruaimi Chin ralkap phu hna nih nihin ah kah hram an thok kong CNA chimphuan nak nawl ngeitu Salai Htet Ni nih Khonumthung ah a chim.
Nihin May 16,zinglei thok in Tonzang khuapi hrambunh SAC IB 269 battalion sakhaan cu Chinland cozah runvennak zung kuttang um Chin ralkap phukomh hna nih an tuk kong Salai Htet Ni nih cun a chim.
“Tonzang um SAC 269 sakhaan kan kah mi a si.nihin zinglei in kah hram kan thok,SAC lei nih Jet Fighter hmangin kahdohnak voi 3 a rak tuah cang kan mah lei in hliam tuar le kawngdeng an um hraw lo. CNA le Chin hriamtlai phukomh hna nih SAC kan kah mi a si caah mizapi nih kan ttanpi cio hram uh .A tu kan i kah mi cu ZRA he kan i kah mi a si lo” tiah a chim.
May 11 lio ah khan Tonzang peng Lungtak khua ah SAC nih bomb a rak thlak caah biaknak inn 2 le mizapi inn 5 a rak rawk i Lungtak khuate le a pawngkam um khuate 5 in minung 1000 tluk ral an zam hna tiah theih a si.
