Pu Khua Kung (Panglong biaren minthu Pu Kio Mang fapa)
================================
2020 November cun Kawlram bualcotu ding fianter ni a si bang Tlangcung Miphun zong a si ve lai. 2018 hlan cu khuathar kan unau nih bual a co tawn nain 2019-2020 cun Chuncung le Hniarlawn nih an co ve cang. Cu ve bang in Chin Miphun nih Bual co caan a si ve cang ti fian a herh tuk. 1962 in 2010 tiang cu tlaihhrem uknak le Hriamhar in uk kan si. 2010-2015 tiang kha a deu Democracy in USDP nih uk ṭhan kan si. Kawlram pumpi in a dik mi uknak duh cio a si caah le ralkap uknak duh lo ruang ah NLD mee kan pek cio nak cu a si. USDP an hram cu ralkap a si bang NLD zong an hram cu Kawlmi an si cu zapi hngalh a si. Chin mi nih Kawl mi kan bawmhnak hna kha an kan teinak tu ah a cang. Kan lung fim cio awk tuk a si cang.
Karen le Tuluk ral tuk bawmhnak Col. Van Kulh, Major Cawrap nih an chim ṭial mi kha a dik mi bia a si. Chin mi dawtnak a hngal lo mi Kawlmi an si hih.
Panlong biahren Federal a ralchanhtu hi tlukceo le keucheu a si mi Usaw le Nevun an si hi a dik mi a si ko. Palh bia a si hin lo. Lungfim hrimhrim awk tu kan si cang.
Kawlmi fangkhat Tlangcung mi fangkhat timi kha hlan Party unit chungtel zong nih a sullam an rak hngal kho ve lo.
Chin mi kan hmelchunh ah lungfek Vapual kan timi hi B.A, M.A. Ph. D zong nih cawn in hngalh khawh phun a si lo. Lothlo tarpa tu nih cawn loin hngalh mi tu a si.
A cung lei 1-4 tiang hi ka lih in ka palh mi a si lo. A dikmi bia sullam an sinak ka fianter lai.
Karen le Tuluk kha 1stle 4thChin nih kawl mi raltuk an bawmh hna i, an teipiak hna ruangah Kawlrawn hmun kip ah Chin mi an lu an i phum. Chinmi chungkhar an mitthli a hul bal lo. Philh a har hringhran ko. U Nu, Nevun, Thanshwe chan ah cun Ralkap in Civil uknak tiang lutlaitu ah Chin mi an hmang duh bal hna lo.
Aung San hi Mirang nih a lung an tei kho lo. U Saw cu fawi tein an tei khawh. Tei hnu cun hlen a fawi tuk chin caah Panlong biahren ah Federal pennak cherhchan lak in minung hlenthawinak a zumh caah Aung San le a vuanci an lu a hloh dih nak a rak si bang, Nevun zong nih Federal pek a duh lo caah uknak a chuh i, kan pale thong a thla dih tu a si ve caah tlukceo le keucheu ka ti hna nak a si.
Aungsan le Panlong biahren an tuahmi kha thildik taktak a rak si ko. U Saw le Nevun tuahsernak nih a dik ti a fianter hi mu. Chin mi teirialnak tu ah canter usih. NLD zong nih kum 5 chung ah a mu an cip rih lo hih.
Kawlmi fangkhat tlangcung mi fangkhat timi kha tangka fang in an ruah caah Party Unit nih a si kho lo an rak ti duhnak cu Chin mi kan tlawm tuk, Kawlmi an tam tuk an ruah palh bia a si an ti, an chim mi ka theih ve. Kawlmi nih an i lak ve ning ah Kachin fangkhat Kawl fangkhat, Chin fang khat kawl fang khat an ti ve, mah ning cun sisehlaw, Tlangcung miphun pasarih nih phunkhat fangkhat cio kan co lio ah Kawl mi nih fang sarih an co awk a si hnga, an i miak tuk hnga cuh. A si kho lo mi an si veve, chim duhmi cu mahle nuhrin covo cio hmuhtinh ding tu a rak si . Hi pek duh lo ruang ah dahkaw Tlangcung mi hriam an lak ve cio nak a si cuh.
Chin mi kan hmelchunh ah VAPUAL a si, kan tinak a biapitnak cu zumhtlak lungfek ngei lungthin ding, zuanzam duh lo, a khuah tein a um mi va phun an rak si. Hlan Chin mi nu le va zong hi Vapual nun a rak ngei ve, mi lungfek lung ding ngei, mi zuangzam lo an rak si ca le bia le hla cuang ah a rak um tawn mi va bawi phun a si caah phuntanh Chin mi nih mah le miphun cu lungfehnak he upat hmaizahnak in kan Chin ram ah Bual co caan a cu ve hrim cang. Chim le ṭial ka duh bik nak cu a si. Chin ram cozah an can i uk pennak nawl a ngei cang mi cu USDP le NLD an si cang caah atu 2020 thimnak ah cun Chin mi nih Bual an co ve caan a si ve ko cang. Lungthin dang hlenthawinak mah phun zuartu kan si hrimhrim awk a si ti lo. Cucaah na kutchung um mi catlap hmete cu na miphun an zal chung ah hei sanh law na lungthlitum na co ko cang lai.
(Pu Khua Kung cu Panglong hnatlaknak biahren Chin miphun aiawh in min a thu tu lak ah aa telmi Pu Kio Mang fapa a si.)
