Sagaing ramthen,Kalaymyo chaklei ah SAC nih fak piin ral hmai a nor caah tualchung hriamtlai hna he kahdohnak fak piin a chuak i tualchungmi 10,000 leng ral an zaam i phone le internet line zong an rawk tiah theih a si.
A luancia April 5 thok khan SAC nih See-Gyi khua lei ah rallam an sial i dothlennak ralkap he April 7 tiang kahdohnak fak piin a chuak.SAC nih Drone bomb an thlak tuk caah tualchungmi tampi a him nak ah an zaam hna.
SAC ralhraang hna cu See-Gyi in ran rak kai thluahmah i nizan ah khan cun Pyin-Khone-Gyi khua an phaan cang tiin thawng a len caah khuami hna cu zaan lai ah ral an zaam hna,phone le Internet line zong an rawh caah pakhat khat a cal sual zong ah pehtlaihnak a harsa ngai” tiah khuami pakhat nih a chim.
A tu bantuk in SAC nih rallam an sial caah Kalay peng See-Gyi khua,Maw-Sii khua,Ngetpyaw-taw khua,Han Thar Khua,Pyin-Khone-Gyi khua,Yauk-Chu-Kun khua,Mine-Nwe khua,Nan-Chaung khua le Pyi-Daw-Thar khuate hna in tualchungmi 10,000 leng cu a him nak ah an zam hna tiah theih a si.
Nihin April 8 tiang zong ah SAC le tualchung hriamtlai hna kaphnih kar kahdohnak fak piin a chuak cuahmah rih i April 5 lio ah SAC nih an kah mi hriampi ruang ah tualchungmi minung 5 nak tlawmlo nunnak a liam leng ah 15 leng nih hliam an rak tuar tiah theih a si.
