CBN Sport News, 19 Oct 2020: Stamford Bridge ah Chelsea hmaikal nih vom nam bak in game zohdawh an langhter i goal 3 bak an thun nain tlar hnunglei (defence) taw a zut, Southampton nih goal 3 thiam an thun ve.
Frank Lampard turun hna hi zarhteni zan ah khan Saints he 3-3 in an i tluk i Hallowoon kaltak in pound €200 million hmangtu Chelsea team nih puai 5 an chuih chung ah point 8 lawng an hmuh.
Chelsea hi cawn nihnihni zah ah Europ i league champion a simi Sevilla he an i tawng than lai. Chelsea hi Champion league group E ah Sevilla, Rennes le Krasnodar hna he Group khat ah an um i knockout stage luh harsat dawh a silo.
Mendy ai hliam
Chelsea keeper (kawlbawh) thar Edouard Mendy ai hliam ruangah Kepa Arrizabalaga nih hram a thawk.
Frank Lampard turun hna nih Eagles an taih lio ah goal an thunter ve loh, Chelsea nih goal 4 an thun, hi lio i tlar hnunglei player biapimi pahnih Mendy le Thiagl Silva an hman khawhlo nak ruang hi international break ruangah a si tikhawh a si, kum 35 mi Silva hi Brazil caah chuih dingin South America ah a kal ruangan dinhter chung a si.
A min cu Werner
Southampton manager Ralph Hase huttl nih Match chuih hlan ah RB Leipzig i a rak zohkhenh mi Timo Werner a fak, German forward nih hin a pu thing hmai ah a theihnak a langhter. Kum 24 mi Werner nih minute 13 nak ah Ben Chilwell cross piakmi cu goal ah a thun, Premier league goal thun hmaisa bik ah i ruat hmanh sehlaw offside arak si ruangah goal ah cohlan piak a siloh.
Germany international forward a simi Werner hi sau a vanchia loh, ahnu minute 2 ah Chilwell nih ball a pekmi cu dawh taktak in a lanhter i a hmai ah a tehtak, defender Jan Bednarek cu a lehpel i kehlei kap in ball a lâk rualai tiah an ruah lio ah defender tamnak lei ah ball a tehpi i goal box chung in goal ah a thun.
Werner nih minute 28 nak ah Jorginho sin in ball a hmuhmi cu keeper Alex McCarthy chuihpehnak ah a hman hnawh hnu ah a lu in goal chung ah a tauh luh cawlh i a thiamnak amahnih a fehter.
Chelsea nih Werner lawng a ngeihmi a siloh, Mount, Kai Havertz le Pulisic hna angeih rih ruangah an hmainawr ning a fâk.
Tlarhnung lei taw a zut
Chelsea hmailei tlar cawlcangh fah cu tlar hnunglei vampang pin that lo ruang le daithlan ruangah zei hmanh lo ah a cang. Havertz nih a caan lo tuk ah ball a thlah ruangah Danny Ings nih minute 43 nak ah dawh taktak in Chelsea lei goal ah a thun.
Minute 57 nakah Chelsea defender Kurt Zouma nih back pass a chanh sualmi cu Adams nih a dawi colh i Kepa nih a tuahding a tuah tilo, ai zizang buai kar ah forward Adams nih Chelsea goal ah denlel bak in a thun.
Chelsea nih talent an rak ngeih that ning a lang than, minute 59 nak ah Pulisic le Werner izuamnak theipar an zun, Harvertz nih a rak tisual mi chamnak ah dawh taktak in goal ah a thun, fawi tein Chelsea nih teinak hmu ding a lo cang nain injury time ah an țan a dongh.
Saints forward Theo Walcott volley luhmi cu Jannik Vestergaard nih a lu in a rak don i a pialter, Ralph Hasenhuttl turun hna nih Chelsea goal an cham khawh, Frank Lampard turun hna cu lu i domh i khuk i bil lo cu tuah khawhmi dang an ngei tilo.
Lampard a thin hung
Chelsea boss Frank Lampard nih “Goal ter bak lo nakding ah kan goal ter hna, pumpak palhsual ruangah kan ral hna nih ruahchannak an ngeih phah, team bantuk in hmainawr kan herh, kan lei ah goal terlo ka duh” tiah tlarhnung lei remh than a duhnak a chim.
A tu season Premier League ah Chelsea hi match 5 an chuih chung ah an lei goal ah goal 9 a lut cang. Lampard zohkhenhnak tang ah league match 43 an chuih cang i match 43 chung ah chelsea lei ah goal 63 a lut cang, Chelsea manager vialte lak ah record ngei chia bik a si rih.
London club nih hin Sevilla an chuihpi khawh in October 24, zarhteni zah ah Manchester United he an i tawng lai.
CBN Sport News
