CBN Sport News, 20 Oct 2020: Europe i football i zuamnak sangbik UEFA Champions League cu tuzan cawn nihnihni zan thawk in zohding a um țhan canglai. Group H ah Paris Saint-Germain (PSG), Manchester United, RB Leipzig le Istanbul Basaksehir hna an um ți i, tuzan zanlai ah Paris khuapi ah French champion nih Ole Gunnar Solskjaer naule kut an tlaih lai.
PSG nih Season liamcia ah khan Edison Cavani hi a contract a sauh piak lo, Portugal chuihnak Mini Tournament zongah ai langh ti loh. Uruguayan striker nih hin Manchester United lei a panh, Covid-19 ruangah quarantine in erh a si hnu ah zarhpini ah khan training nak ah a lut than i a club hlun he an i phomh lai.
French champion
PSG nih hin season hmahnung pariat ah voi 7 Ligue 1 hrai sunglawi a co, Club ngeitu Qatar sports investments zong nih an duhbikmi cu French champion silo in Champion League hrai dawh a si.
Europe manager minthang Carlo Ancelotti, Laurent Blanc le Unai Emery hna an hlawhchamh hnu ah Thomas Tuchel a vun lang. German manager Thomas Tuchel nih hin champion League hrai dawh co rih hlah hmanh sehlaw season liam cia ah khan final an lut kho, Europe club nganmi hna lak ah hrelh sual khawh a si tilo.
PSG hi a tu season ah an hramthawknak a țha loh, Lens le Marseille hna lak ah sung hmanh sehlaw match hmahnung ah teinak an hmuh i an goal zong an vun thun kho ngai. Zarhdongh ah khan Neymar tello in Nimes 4-0 in an phomh khawh, hi hlan deuhvak ah khan Angers cu 6-1 bak in an rak phomh hoi cang.
Manchester United he an chuih tik ah World Cup Qualifier chuih ruangi an hahdinhtermi Neymar an hman țhan lai. Barcelona forward hlun Neymar nih hin Peru lak ah hattrick a ser i, Neymar (goal 64) nih hin Brazil caa i goal thun tam lei ah Ronaldo (goal 62) a lonh in Pele (goal 77) lawng a tluk ti loh.
Pound €200 million man Neymar pakhat hmanh hi buaipi awktlak a si, a dirkamhtu Kylian Mbappe hi Pound €163 million man a si i French forward an țhat ning chimtam a hau tiloh. PSG an țhatning chimfian fawinak cu, Manchester United player biapi bak rak sitawn mi Ander Herrera cu mandat (bench) ah an țhutter, English Club hna lak zongah champion dingi zumhkai bik pawl an si.
PSG legend
Manchester United number 7 i hruk ding Edison Cavani hi French champion nih rak hlawtcang hna hmanh seh, PSG caah goal thun tambik record ngeitu a si rih, PSG caah goal 200 bak a thun cang.El Matador min deu an pekmi Cavani nih French club ca i goal a thun cangmi zat hi Mbappe (94) le Neymar (72) hna goal thunzat fonhmi nak in a tam deuh rih.
Mbappe nih “Cavani hi hmailei caan ah duhsaknak ka ngeihpi, a sinain team dang ah ai țhial cang, kan team a si tiloh, kan i tawng lai i teih kai tim” tiah celhtual ah hawikomh tha sinak langhter ai timh lo nak a chim.
Cavani pin ah hin United player thar Alex Telles le Facundo Pellistri hna zong an i langh rih lo, PSG he an chuih tik ah an i vun i langh laimaw a fiang rihlo, Uruguayan striker chuih hnuhnun bik cu tukum March 11 i PSG le Borussia Dortmund an chuih kha a si i match fitness a ngeituk rih lo.
United an tha a tho
Ole Gunner Solskjaer nih zarhdongh i Newcastle United an teih hnu ah “Season ni ceudawh a chuak țhan” tiah tha tho ngai in ai hngahhlangnak a chim, St James’ Park ah an cawlcangh a țha ngai nain ruah ding a tam. Dantat ruangah Anthony Martial a chuih kho lailo, a sinain amah zatka (thlengtu) Marcus Rashford a cawlcang kho ngai.
Juan Mata le Daniel James hna nih Newcastle he an chuih lio ah Manchester United caah zumhtlak an sinak an langhter cang, Newcastle he an chuih lio ah khan Paul Pogba le Player thar Donny van de Beek hna cu mandat (bench) ah an țhutter.
Hi lio ah tlarhnung lei zoh ah Manchester United țanhtu thin phang in an um kho. Goal vennak lei ah sawisel ding um baklo mi Aaron Wan-Bissaka hi cross a ngeih țhatlo ruangah cinh deuh a herh, defender manfak bakmi Harry Maguire le a țanpimi Victor Lindelof le Eric Bailly hna pin ah Luke Shaw le keeper (kawlbawh) David de Gea hna hi i chuahsual caan an ngei țheu tawn.
CBN Sport News
