Chin ramkulh,CDF-Daai hmunram chung ah thlahnih chung tuahmi operation chungin SAC ralkap battalion commander 1 telh in ralbawi 4 cu thah an si i Major 3 le Captain 8 hna telh in a dang ralkap 59 hna cu a nungin tlaih an si kong theih a si.
2024 thlahnih chung operation chung ah SAC he kadohnak voi 4 tiang a chuak i SAC ralkap bawi lei telh in 60 tluk an tlaih khawh hna hi a si i hriamnam tampi an laak kong CDF-Daai general Secretary Aibax nih Khonumthung Burmese ah a chim.
“Dothlennak ralkap ttangti in rian kan ttuannak a phi chuak a si,SAC ralkap hna cu an dirhmun a tha lo ngai cang,an tuh bang in an zun tha a si ko” tiah a chim.
A nung in an tlaih mi SAC ralkap minung 59 chung ah hliam faak a tuar mi minung 7 an si i CDF-Daai sii lei riantuantu hna nih an tlopbul cuahmah hna tiah theih a si.anungin tlaih mi hna cu ralkap lei zulhphung Geneva Convention he aa tlak ningin kan tawlrel hna lai tiah nihin February 28 ah an thanh.
A luancia January 28 ah “Mon Taung” Operation an tuah i SAC Captain 1 telh in ralkap 11 an tlaih hna.February 7 ah Lawngpui tlang ah CNA,CDF-Daai le dothlennak ralkap dang hna ibawm in SAC ralkap Ralbawi hna telh in minung 23 cu chin ralkap phu sin ah hriam an chiah tiah an langhter.
February 10 “LungYinTaung” Operation le February 21 “Hlawngawitaung” Operation ah SAC ralkap Major 2,Captain 3 hna telhin ralkap 7 kan tlaih hna tiah an thanh.
CDF – Daai nih cun Chin ram le Chin miphun luat nak ding caah le hramhram uknak a hram in bawngh a si tiang unau dothlennak ralkap hna he ttangti in le pehtlai in hmai kan nor rih lai tiah an langhter chih.
