Salai Ropui Zaathang| CBN Hakha| 24 October 2020| Caw Buk A Lamkip Thanchonak Bu le Khuabawi U Than Lwin karlak i report nak cu cozah nih October 29 hlan ah hma an lak lo ahcun cawbuk mipi lam kan zawh lai tiah CBN ah an chim.
Thlakhat chung Hakha GAD zung ah report nak tuah in rianphuah an hngah mi Caw Buk Khuabawi U Than Lwin kong ah GAD nih October 29 tiang tuanvo an lak lo ahcun Caw Buk khuami lam kan zawh lai tiah CBN ah an chim.
Caw Buk ah inn hra lutlai (ဆယ်အိမ်ခေါင်း) minung pathum a si mi Pu No Hei, Pu Hei Hnin le Pu Thla Uk si hna seh, Rev. Van Cem, Saya Bawi Thang le Caw Buk A Lamkip thanchonak lutlai Pu Ni Kam hna cu CBN nih biaruahnak kan ngeih hna khuabawi U Than Lwin an duh lonak kong cu fak piin an langhter.
Pu Than Lwin nih Caw Buk khuabawi kum 3 a ttuan chung ah inn hmun 13 a zuar tiah zapi nih an theih nain a tak ah hmun 33 a zuar tiah an chim. Cu leng ah innhmun man phaisa a lak hna nain innhmun a pek lo mi inn hnih an um i, Phaisa zong lak innhmun zong pek nain a chuh tthan mi hna zong inn thum an um tiah an chim.
Pu Than Lwin nih kumthum chung Cawbuk khuabawi a tuan chungah general meeting voikhat hmanh a tuah bal lo tiah an chim. Cu pin ah kum thum chung cozah bawmhnak a tla mi zong hi mipi sin ah fianghlang in chimrelnak a um hrimhrim lo tiah an chim fawn.
Cawbuk Baptist Church in Rev. Van Cem nih cun,
“Cawbuk tuanbia kan zoh tikah khuabawi hi tazacuai an tong bal lo. Sang an dawt, mipi he lungkhat tein rian an rak ttuan. Kumkhat ah a tlawmbik general meeting voithum tal an kawh. Khuanun khuapa, pastor te he rian an rak ttuan tti. A tutan hi zeihmanh a um lo. Kan duh mi langhternak nawl a um bal lo. Ram kong zong ah a vaivuan ngai. Cawbuk ah upa thlan kan ti mi pakua cu lam an chunhnak nih a cim ding an si. Cun no.2 thlanhmun (ekah 36) hram bak ah khuabawi a kai bak in nld mino a pek hna. Cu pin ah Ka inn hmun hi ekah 10 tluk cu thohkhansa a ka pek hnu ah a ka chuh than. A ka buaihnawh than”
tiah a chim. Pu Ni Kam nih, “Cawbuk nih kan hman mi tihna cu Senthang Baptist Church a pek hna” tiah a chim.
Caw Buk khuabawi Pu Than Lwin report nak kong he pehtlai in thlakhat chung an rauhnak ahhin Hakha GAD in upa pakhat U Tint Wai (duh htwe-oh) nih a ttanpi ruang ah hi tluk n a caan a rauh nak a si ti tiah CBN an an chimchap. Cawbuk mi nih Duhlonak langhter ding ah Saya Bawi Than nih a chimh lio zong ah U Tint Wai nih, “na duh ahcun nangmah lawng teh sandah a va piah ko” tiah a hro tiah thawng kan theih.
Cu leng ah Hakha khuapi ah NLD cozah nih a tu tiang a hluhchuah khawh taktak rih lo mi Ekah 676 cawbuk vawlei zong kha khuami chim lo in cozah sinah khuabawi Pu Than Lwin nih a rak zuar mi a si tiah an chim.
Hi kong he pehtlai in Pu Than Lwin cu CBN nih biahalnak kan ngeih tthan tikah buainak ai thawknak le thilsining cu hitihin a kan chimh ve.
“hi thil ai thawknak bik hi Rev. Van Cem ruang ah ai thawk. Cawk Buk A lam kip in thancho nak bu nih cawbuk kek le mipem sathlai an kan thlei dan khuabawi tuanter a kan duh lo ruang ah an ka report nak a si”
tiah a chim. Cawbuk inn 230 nih khuabawi duhlonak minthut mi kong he pehtlai in Pu Than Lwin nih,
“Inn 230 nih an report ti mi zong kha hitihin a si. Inn khat ah minung 5/6 in min an thutter hna i kha kha inn 6 ah an ser hna. Minthu mi ah a thi cia mi zong an i tel. Lih le hrokhrol min an thut. Cu ruang ah khuabawi in ka ttum duh lonak a si. Lih le hrokhrok in thil an tuah ruangah khuabawi in ttum ka duh lo. An duh le lam cu zawh ko hna seh”
tiah a chim.
Cawbuk ah Remdaihnak an duh maw?
Cawbuk khuabawi report nak kong he pehtlai in naihrawng ah facebook le social media siseh, local media hna zong in tampi an langhter i remlonak fak piin a chuah cu mipi nih hmuh a si. Hi kong ah remdaihnak a um kho tthan lai maw, a si lo ah Hakha GAD nih ttuanvo an lak le lak lailo ti mi cu a tutiang hngalh a si rih lo. Cawbuk ngunkeng le inn hra lutlai rian a ttuan mi Pu Ngun Nawn nih cun,
“hi mei a kau tu hi Pastor an si. Cawbuk pastor le biaknak lei riantuan tu hna nih remdaihnak thawk ding ah anmah lila cu report tu an si ca ah cawbuk ahhin cun remter kho tu an um ti lai lo ee. Cu ca ah kan pale HBA hruaitu hna dah lo nih cun a kan remter khotu an um ti rua lailo”
tiah a chim.
Cawbuk A Lamkip Thanchonak Bu lei in cun “Khuabawi Pu Than Lwin nih, ka palh ti sehlaw Khrihfa kan si ca ah ai rem kho kan si ko” tiah a chim ve.
