Siang Awr Lian| CBN Hakha | October 2020 | Cawbuk khuabawi kumthum tluk a ttuan i, Cawbuk inn 230 nih report an tuah tiah theih a si mi Cawbuk Khuabawi Pu Than Lwin cu a rian an phuah cang tiah theih a si.
“Hakha GAD zung lei nih kan khuabawi phung ning tein phuahnak ca an kan pek cang” tiah Cawbuk a lamkip thanchonak bu lei in lutlai Pu Ni Kam nih a chim.
Hi rianphuahnak kong he pehtlai in Cawbuk a lamkip thanchonak bu in chungtuan Saya Bawi Than nih cun,
“rianphuah lawng hi a za lai lo. Inhmun a zuar mi kong siseh, Phaisa a lak mi kong le dikfel lo riantuannak kong pawl zong ahin hmailei ah hnahnawh tu le dawnkhan tu um loin thil dik ning tein a chuah khawh nak hnga riantuan kan i tim”
tiah a chim.
Cozah nih October 29 hlan ah khuabawi Pu Than Lwin a rian an kan phuahpiak lo ah cun lam kan zawh lai tiah Cawbuk A Lamkip Thanchonak Bu nih an rak thanh.
A tu lio ah cun Cawbuk khuabawi ca ah inn zakhat lutlai (ရာအမ်ခေါင်း) Pu Taung Lwin cu phung ningin an thim chung tiah thawng kan theih.
Cawbuk khuabawi Pu Than Lwin nih Caw Buk khuabawi kum 3 a ttuan chung ah inn hmun 33 a zuar pin ah, innhmun man phaisa innhmun a pek lo mi inn hnih, Phaisa lak innhmun pek nain innhmun chuh tthan tibantuk ruang ah report an tuah nak le an duhlonak an langhternak a si tiah theih a si.
Relchap: Cawbuk: October 29 Tiang Ah Kan Khuabawi An Phuah Lo Ahcun Lam Kan Zawh Lai
