Rampi uknak a chut tu Ralkap Council upa minung pakua hna nih Canada cozah le UK cozah nih phihkharnak a tuah ve cang hna tiah theih a si. Hi phihkharnak kong ah US ramdang vuanci Antony John Blinken nih kan in lawmhpi hna tiah a thanh cang.
Antony John Blinken nih Twitter in a tar mi ah “an tuah mi kong ah tuanvo a la ngamtu an si kha an hngalh khawhnak ding ca ah lungrual tein kan tuan hna lai” tiah a tial.
Mipi thim mi cozah thla in mipi thim mi cozah hruaitu pawl a tlai tu Ralkap Council upa pawl cu phihkharnak tuah cuahmah ding ah US nih vawleicung ramkip cozah cu a forhfial cuahmah cang hna.
A luancia zarh ahkhan US president Joe Biden nih nawlpeknak thanhca a chuah i, Kawl ralkap hruaitu minung 10 hna le an chungkhar pawl he ai pehtlai mi chawlehnak phu thum hna cu phihkharnak fak ngai in a tuah hna.
Canada ramdang vuanci Marc Garneau nih cun, “Kawl ram ah Democracy ningcang tein thim mi cozah cu nawlngeihnak ap than ding ah vawleicung ramkip nih an hal bantukin Canada cozah zong nih kan i ttom ve cang. Ralkap nih uknak an lak hnu in mipi cung ah nuhrin covo buarnak le ningcang loin tlaihkhihnak a tuahtu hna thlah ding ah ramkip nih an hal bantukin kan nih ram zong nih kan hal ve cang hna” tiah a chim.
UK cozah zong nih “Ralkap nih fak ngai in nuhrin covo an buarnak kong ah tuanvo a ngei tu Defense minister Colonel Myat Htun Oo le Home Affair minister U Soe Htut, Depity Minister Leutenant Colonel Than Hlaing hna cu vawleipi nih phihkharnak kan tuah cang hna” tiah an thanh.
Source: BBC
