2008 constitution ningin Myanmar ram nawlngeihnak cu caan kan laak chung tiah kawlram mizapi le vawleicung ramkip a hleng i hramhram in uknak/nawlngeihnak a la tu SAC hna nih caan karlak president rian an khinh mi U Myint Swe cu a ngandam kong ah a zualhma ngai tiah mizapi theih in SAC nih July 18 ah thawng an hun thanh.
U Myint Swe i a luancia 2023 kum thok ka khan a ngandam nak a tha tuk tilo nain SAC nih an thuhnawh i a tu ah a thahri lei a zual ngai bantuk in rawl zong a ei huaha ti lo caah thanh lo awk tha lo dirhmun a phak caah July 30 tiang ngandamnak thlop bul dingin aa dinh chung kong an hun langhter.
U Myint Swe cu ralhraang bawizik Min Aung Hlaing nih uknak caan a sauh khawh nak ding ah a biapi cem mi a si. thla 6 ah voikhat in nawkngeihnak caan sauh dingah Defense and Security Council (ကာ/လုံ) a au kho tu cu president Myint Shwe lawng lawng a si.
2023 kum thokka U Myint Swe cu a ngan a dam tuk ti lo kha Min Aung Hlaing nih a theih. Ruah lo piin U Myint Shwe a thih ah cun Pu Henry Van Thio cu President ah a kai ding a si.Pu Henry Van Thio cu NLD cozah chan ah Vice President rian a rak tuan mi a si caah Min Aung Hlaing nih 100 ah 100 a control khawh lo ding a thin a phaang.
Cu caah Pu Henry Van Thio cu a luancia April 22 ah khan a ngandamnak lei a tha tilo tiin Vice president sinak in an dinh ter.SAC nih aa tlaih mi 2008 phunghrampi ah SAC ralbawizik nih president le Vice president hna hi an rian in a dinh ter khawh hna timi aa tial lo. Cu caah 2008 phunghrampi ningin kan kal a ti lengmang mi SAC hna nih an phung lila an buar mi a lang khun.
Laak hruak in thla 6 caan an sauh mi cu tu thla July ah a dih ding a si cang i hi hnu thla 6 nawlngeihnak laak than dingah a biapi mi U Myint Swe le Pu Henry Van Thio an um ti lo caah SAC nih uknak/nawlngeihnak an hmuh khawh nak ding ah lam pakhat khat cu a tuah a hau cang.
SAC ralbawizik Min Aung Hlaing nih a tuah te dingmi thil phun (3) a um. Cu hna cu a tanglei bantuk hi an si hna.
A Pakhat Nak : 2008 phunghrampi hman mi cu caan karlak ngol i Myanmar ram vialte ralkap uknak in kalpi. Hi ti a kalpi ah cun a pu a si mi Than Shwe nih a duh ning tein a rak suaisam mi 2008 cu hrawh lo in uknak a kalpi khawh mi a si. hi lam hi a hman ah cun 2025 ah thimnak ka tuah hrim hrim lai i nawlngeihnak ka ap lai tiin aa phetsawi kho.
A Pahnih Nak: 2008 phunghrampi hrawh i ralkap uknak in kalpi.
A Pathum Nak : Hramhram in uknak laak a si sinin kawlram chung vialte harsatnak le buaibai nak vial te tuanvo laak nak ah tiin a nawlngeihnak cu kaltak in a tu lio ah a linsa ngai mi U Thein Sein sinah nawlngeihnak pek in ram hruaitu cozah pakhat ser ding. Cu lam cu a kalpi ah cun ramhruai tu cozah thar nih 2008 phung hrampi cu caan karlak zul loin Myanmar ram chung buaibai nak vialte cu ramkhel lei in biaruah nak a tuah khawh hna.
