CBN News| Thantlang| Thantlang khua ah tuzaan lei 4:50 pm hrawng ahkhan nuva khuahkhat bia alnak ruang ah an pa nih an nu cu namtong in a tuk i a nunnak a liam.
Lainawng tu hi Thantlang peng Thangzang khuami Pu Si Bik a si i, an nu hi Hmunlipi khua mi Pi Biak Hnem a si. Tuzaan lei January 21 Suimilam 4:50pm hrawng ah hithil a can hi a si.
Nuva bia an i al lio ah an pa Pu Si Bik nih namtong in Pi Biak Hnem a tukbukhur ah a tuk i, a tuknak hmun ah a thi colh tiah theih a si.
Lainawng Pu Si Bik hi Evangelist bantukin khuakip ah thawngtha a chim tawn mi a si i, a pianthar hnu cu a lung hi a dik ser ti lo tiah naihniam mi nung hna sin in thawng kan theih. Chungkhat le konglam a hngal mi hna nih an chim ning ah cun,
“Bikte hi a pianthar hnu cun a lung hi a dik set ti lo i, a mah le a mah hna thah ai tim tawn. Cun, zeibantuk hmanh ahhin keimah palh a si, ka fale hna nih hin ka that ulaw ti hna in bia a chim tawn i a tu ah hibantuk in an nu tu nih a tuarnak hi a si”
tiah an chim chap.
Pi Si Bik hi kan hnu te ahkhan Tlang cawnpiaknak le thlacamnak ah an nu nih, “kan pa hi a lung a hman lo ca ah a tha deuh hnga maw tiah ka kalpi i, ai ning ngai tiah a chim” tiah a rak chim ti a si. Asinain, a rauh hlan ah hitihin thil an ton hi a si.
Hi thil a can lio ahhin Pu Si Bik le Pi Biak Hnem hna an fale an um i, bia an i al zong an theih pin ah nam in a tuk lio zong ah an fale an um ko tiah theih a si. An naunu pakhat cu a tih tuk nak ah a tom ti a si.
Thil a can hnu ah innpa chakthlang nih an chuahhnawh hna i Pu Si Bik cu an tlaih hnu ah Palik an phan ti a si. Pu Si Bik nih a chim an tinak hmurka cheukhat ah cun, “bia alnak kan ngei lo. Ka chung ah thlarau tha lo a um” tiah a chim ti a si.
Pi Si Bik le Pi Biak Hnem hi fa pasarih a ngei in chungkhar a dirh i, Thantlang khua ah khua a sa mi an si. Pu Si Bik cu palik nih an tlaih i an kalpi cang tiah theih a si.
- CBN Thantlang
