By F. Lai Len
Biahmaitthi
Biaknak le Ramthel Rian cu aa Tthen (Separation of Church and the State) timi hi vawleicung pumpaluk nih a pommi norm/standard a si. Vawlei lei (secular world) zong nih a pom i, Biaknak lei (religion world) zong nih a pom. Baptist Zumhnak Tlaihtleng zong ah mah cucu aa tel bak ve. Nain, kannih Laimi/Chinmi theo cu mah zong cu a thei lomi, a pom duh lomi kan tam tuk rih, zaangfak awk in!!!!
Nihin kan Laimi lak ah a lar ngaingaimi ramkhel rian le biaknak hi Laimi nih zeitin in dah kan lung a fian i, zeitin in dah kan cawlcangh, zeiti lei lam in dah kan fuhpanh i zei bantuk tinhmi le saduhthah dah kan ngeih, tihi cuanhpah buin thil sining taktak lei ah a dikmi lamthluan in kar va hlan khawh ding ah ruatpah cang usilaw, timi lungthlitum he hi cabia hi ka hun chuahpi. Aho pumpak hmanh kutsawh a um lo nain, a hnorsuanmi hna an um sual ahcun a ruah zia thiampiak dingin kan nawl hna. A ruahzia an thiamlo sual ahcun anmah le anmah lila i remh ding asiloah a thar i chuah ding zongin kan nawlchih hna. Zeica ah dah ti ahcun, kannih Laimi/Chinmi theu cu vawleicung thil a kalning zoh duh lo, zulh duh loin hnu i chit le mer tak hna kan hmang tawn i, purh lo kan purh, pah lo kan pah caah pinglo le panglo ah aa ciahmi kan um sual tawn caah!!!
Biaknak lei Laimi kan dirhmun
1899 kum thawk in Lairam/Chinram ah Khrih Zumhnak (Christianity) thlaici cu a hung phan i cu hnu 1920 hlan deuhvak in Pathian riantuantu Laimi kan pule pawl an hung chuak. Cu hna kan pule thawk in 1970 kum hrawng tiang Pathian a riantuantu kan pale hna cu anmah nih Pathian zumh bak, thih ah thih phu, nun ah nun phu ti in pumpeek bak in an rak tuan hna i thlarau riantiannak ah an kephau a rak i dawh tuk fawn. Zumtu hna zong nih lungthin taak tein zumh le Pathian a bia le Bible cawnpiaknak kha a thuh biknak an lungthin chungah chiah in an rak zumh/zulh ve. Pathian riantuantu zong Tuukhal an rak si bantukin Pathian a zumtu/zultu zong Tuu an rak si bak ve. Tuu pawl cu Tuukhal nih a tha bik an timi lam in an rak hruai taktak ve hna. Zeitluk in dah a va dawh i, lung a va hmui!!!
Nain, caan raulo 1970 in kanmah lei ahcun cu aa dawh tukmi lam cu duhsah tein a muihmai a hun i thleng lengmang i nihin kan dirhmun ahcun zoh a chiatnak le zoh aa dawh lomi thil tamtuk kan ton cang. A ruang tampi a um lai nain, a ruang bik pakhat cu Pathian riantuan hi mah le mah pum i pek, retheih sifah tuar in tuan a si, timi Khrihfa lungput taktak a hung tlau thluahmah i mah pumpak pawcawmnak ah a hmangmi an tam tuk caah a si, tihi ahopoh nih theih cio a si. Hi kong he aa pehtlai in 1973-1974 kum Halkha peng Lungrang khua i Affiliated Middle School ah siangcachim rian ka rak tuan lio ah pastor Rev. Za Ling B (Lungrang khuami, atu ah a nung rih, kum 90 leng a si cang) nih a ka chimh ning ahcun: Ne Win nih ramdang mi vialte Kawlram in a thawl hna ah khan, kan Laitlang siangbawi Rev. Johnson zong aa tel ve caah culio 1966 ah khan, Halkha peng (culio i Halkha peng le Thantlang peng) chung i a umi mi pastor vialte
-2-
minung 70 leng kha, Halkha khua ah meeting a kan auh, a ti. USA lei a kir lai a si cang caah, bialungduh vialte a kan chimh dih hnu ah a kan siik, a ti. A kan siik bik mi cu: American Baptist Mission nih hin kanmah pawl hi thlahlawh an kan pek. Nannih Laitlang/Chin Hills pastor pawl hi Zomi Baptist Convention nan dirh hnu cun, nanmah le nan khua/peng/tlang (area) cio in Thawhlawm kha i khon in thlahlawh pek nan si. Cu tik ah thlahlawh (wages/salaries/stipends/benefits) hmuhnak hmunhma a tlawm tukmi Laitlang/Chin Hills ah pastor nan tam chin lengmang i atu Hallkha peng (culio Halkha peng le Thantlang peng) ah pastor lawngte minung 70 lengkai nan si cang. Bible lei kan in cawnpiakmi hna khi a hrampi (basic) taktak lawng a si rih, theology a tel rih lo. Cu tik ah pastor le nan tamchin lengmang fawn. Keimah ka kir hnu ahcun, Laitlang Khrihfabu pawl hi nanmah lila nih nan rak hrawh dih te lai ee, a kan ti, a ti.
A cunglei bia hi a dik tak ko rua? Ziah ah dah ti ahcun, Baptist in a chuakthar bu pawl khi, an tuahnak, an thiammi, an pommi pawl zoh tik ah, Baptist zumhnak chung ah a pilmi le aa hrawmmi lawngte ngot an si ko. Theology nih a then hna lo, zumhnak nih a then hna lo, pomnak nih a then hna lo. Nain, peo a duhmi, alu tlaih a duhmi pawl nih duhsah tein lam an sial lengmang i, cuka ram in cu nih, khaka ram in kha ram nih, cu bu nih, kha bu nih an kan dirkamh hei ti phun lawngte in excuse an hei lak cio hnu ah lutlai sinak kha an hei khuar. An lak bak ve, an chanchung lutlai zungzal ding in (dictatorship). Khatikhan bu an ser hnu ahcun, midang le budang he a i kom kho ti lo, Sangpi kan dang, Sangte kan dang (Phungthluk or Chimrelmi)….dirhmun nih a phak phuat hna. Bible pakhat te kha dahkaw, duhpoh in Basic he Theology he an pom, an hrilhfiah fom cu!
(Bialarlak tenh: Rev. Hrang Bik Ceu nih a chim mi cu: Bible pakhat te kan i tlaih ko nain, kei ka hmuh ning, anih a hmuh ning, cu nih cun cuticun a ti, kha nih khan khatining khan an ti tiah an ti ciammam i, ka ni le ka tang nih ngasa thaw taktak in an chuanmi cu, innchungkhar pakhat cio nih anmah duh ning cio in cu ngahang kha cite rak paih cio ruangah, rawl kan ei taktak tik ahcun a khaa tuk cang i ei awk thalo ah aa chuah ee, ti in youtube ah a chimmi ka ngaih bal). Atu ahhin Laitlang/Chinram i Khrihfabu bu a phunphun pawl hi ei awk thalo ah kan i chuah dih cang ko rua? Lungrawh sual ahcun Kawl biaknak Buddhist le phungki ah luh a fawi ngai cang? Asilo hmanh ah a hmasabik Khrih biaknak lei a hrampi a simi Catholic ah kir than a fawite cang?
Biaknak lei bu tampi
Laitlang/Chin State ah biaknak lei a rak lut hmasa pawl cu Catholic, Baptist le hawi hnu deuh ah Buddhist pawl an rak si. Bu neknawi le bu tenau pawl cu a cunglei ah langhter a si bantuk in Baptist in aa thencheu mi an si ngawt dih ko. Bu zeizat ko dik an um ti hmanh hi theih khawh an si ti lo. Lusei ram lei in a rak lanmi zong um dawh a si hoi. Mah bu rel cawklo nih a hrinmi tefa hna cu, (Baptist telhchih in) pastor tahrang khat, phungchim evangelist rel cawk lo, hlasak evangelist a tomtom an si cang.
Cu behbeh ah, Bible sianginn dirh cu ngatafuan in a fuan ciammam i principal rel cawk ko, cachimtu zong a khat in an khat hoi cang. An sianginn he sayate he quality timi
-3-
tlamtlinnak an ngei maw, ngei lo zong cekhlat le dot-hlat a um le um lo hmanh thei kho ti hlah. Biaknak nih kanmah Laimi/Chinmi cu a molh in a kan molh ter ko rua? A rit in dik
kan va rii ti hmanh kanmah le kanmah kan i thei kho ti lo. Cu lak ah biaknak (faith) lei riantuan kha aa miak rua lo maw, zei dik? MP aa cuh lai ee, vawlei lei ah aa mer lai ee, ti a si hoi cang.
Cu lawng hlah, biaknak cu Thlarau lei rian (Religion) lawnglawng a si. Vawlei lei rian (Secular) a si lo. Cu ruang ahdah kaw, Democracy a chuahsemnak thawk in vawleicung mifim pawl nih Biaknak le Ramrian/Ramkhel cu Aa Tthen (Separation of Church and the State) timi vawleicunghuap ram kip le biaknak kip nih a pomhlom mi norm/standard cu an ser fom cu! Nain kannih Laimi theo cu, mah kong zong cu a thei lomi, a thei kho lomi, a thei duh lomi, a pom duh lomi tawr le cheng kan um rih.
Keimah ka theih tawk ah vawleicung ahhin biaknak lei pastor/father/bishop/phungki/rabbi/mawla-wi hna lak ah ramkhel rian lei ah aa cuh balmi, a tuan balmi cu minung pahnih lawng ka theih bal hna. An pahnih in minthang an si lengah, a thluak a thami, mizapi nih an uarmi hna zong an si. Cu hna cu, a tanglei ahhin zoh hnik tuah usi.
Vawleicung ah Pastor/Father/Bishop/Phungki/Rabbi/Mawla-wi (Muslim saya) nih Ramkhel rian a tuanmi hna
Archbishop Makarios III (Cyprus)
Khrih biaknak, Buddhist biaknak, Muslim biaknak, Judah biaknak, Hindu biaknak le Khuahrum biaknak hna ahhin a hlanlio ahcun a minung nih ngeih in ramkhel rian a rak tuanmi, minthang an um pah len ko lai, nain, vawleicung huap in biaknak lutlai sibu ah ramkhel rian a rak tuanmi cu, Cyprus ram ah 1959/1960 in 1974 tiang president a tuanmi Archbishop Makarios III (Orthodox Khrihfa) a rak si. Culio ah Cyprus cu Greek miphun an rak tam deuh i Orthodox Khrihfa an si, an ram thlanglei deuh ah an um. Chaklei deuh tu cu Muslim a biami Turkey pawl (Turkish Muslim) an rak si i an rak buaibai tuk. An i rem lo i a tu tiang an i rem lan ti lo. A thangcho mi thlanglei Cyprus cu Greek Cyprus an ti i a thangcho lomi chaklei pawl cu Turkish Cyprus an ti hna. (Chaklei Cyprus cu Turkey ram nih a tuk, a uk i, an ram cu Turkish Republic of Northern Cyprus tiah an auh. Cu ram cu UNO nih a cohlang lo, vawleicung a zei ram hmanh nih a cohlang lo. Cyprus rampi chung in 34.85% a kau). Cyprus ram cu 3571 sq. miles a kau i, Laitlang/Chin State a bit-kauh cheu 1/3 hrawnghrang lawnglawng a si.
-4-
Makarios III cu a thluak a tha, ca thiam ngaingai mi a si caah, biaknak lei ca a cawnpah bu ah ordain an rak pek. Cun upadi degree zong Boston University (Massachusetts) in a rak awngmi a si. Bochan tlak taktak a rak si caah, Archbishop dirhmun in Cyprus ram cu kum 14 fai deuh a rak uk, mizapi nih an duh tuk caah. Turkish Cyprios pawl nih thah an rak timh lengmang nain a rak luat. 1977 kum ah a thi. (Ref: Wikipedia)
Jesse Jackson (USA)
US ram minak phun (Negro) a si. Greenville khua, South Calorina ah, 1941 kum ah a chuak.University of Illinois, North Carolina Agricultural and Technical State Univertity (BS) le Chicago Theological Seminary hna ah sianginn a kai. Master of Divinity degree a lak. 1968 ah ordain an pek. Nain pastor rian taktak cu a tuan lo. Minak pawl covo caah civil rights movment rumro a tuan . 1968 kum lio King Jr. an kah that hnu ah fak chinchin in minak pawl covo caah a cawlcang. 1984 lio ah US president ah Democratic party in i cuh ve ding ah Walter Mondale he an i zuam i, Walter Mondale nih 38.32% in a tei. Jesse Jackson nih 18.09% a hmuh. 1988 kum zong ah Democratic party presidential candidate hmuh ding ah Harvard University professor Michael Dukakis he an i zuam than, Michael Dukakis nih 70.09% le Jesse Jackson nih 29.70% a hmuh. Cu ruang ah Jesse Jackson cu a mah a party Democratic in thimfung tlamtling a hmuh khawh lo caah, US president cuhnak ngaingai cu a rak lut/hmu kho lo. Atu cu amah zong kum 79 a si cang i, Parkinson zawtnak (kutke thahri fah i therbeh zawtnak) in aa thlop lio a si. (Ref:Wikipedia)
A tulio Chinmi/Laimi kan dirhmun
Hi a tulio Biaknak le Ramrian/Ramkhel cu aa tthen, timi vawleicungpi nih a zulhmi hi kanmah Chinmi/Laimi zong nih kan zulh le kan theih a hau bak ve. Democracy uknak phung kan duh, kan tanh ve tung ahcun, hawi em, em lo si awk kan si lo, tiah ka ruah. 2020 November thla Kawlram thimnak ah Chin State bak in pastor pahnih Dr. a si ee, an timi hna nih MP kan i cuh lai an ti, ti a si ko. Pastor si buin maw an i cuh lai? Pastor rian chuahtak in dah an i cuh lai, ti belte cu a fiang bak lo. An cawnmi le an awnmi zong Bible lei degree lawng te an i bunh hoi. Pastor/Father/Mother le Phungki pawl cu mee peknak nawl hmanh an ngeih tung lo? Zei tin in dah MP an i cuh khawh zia? Pastor si buin kaa cuh lai i, MP ka hmuh lo ahcun pastor rian lei ah kir than te ding hna a si sual maw? Asilo hmanh ah pastor tuan pah buin NRC i a riantuannak ah, Lothlo ti in maw aa
-5-
bunh hnga? ti zong a fiang lo. Pastor dirhmun kha zungzal le a thluangthluan, thih hlanlo ka tuan ti lai lo a ti ahcun, mah cu amah duhthim a si caah, rights a ngei bak ve, MP cuhnak nawl. (Biakarlak tenh: Pakhatpa cu tang 10 a awng an ti. Cupa nih Pathian ka duh tuk caah Bible sianginn ka kaiter u, tiah an khua Khrihfabu a hal hna, ti a si. Khuami nih lunglawm tein an kaiter. B.Th a dih hnu ah M.Th a peh. A cawnmi a dih hnu ah an khua ah pastor rian a tuan duh ti lo. Vawlei lei rian ah a pum aa pe. Zeitin in dah, kum tlampal tal pastor rian tuanpiak hmasa loin an khuami le an khua Khrihfabu an hmai a khah hna,hnga tihi kei cu ka lung a fiang bak lo). Cu zong nih cun dang khat!
Mahti mah duhsalam in Biaknak le Ramkhel rian i nawnnok duh ahcun, ziah, Kawlram chung ah phungki lukawng lawngte pei minung 500,000 hrawnghrang an um ko khi? Ziah Kawl phungki pakhat tal nih MP an i cuh ve hnga lo? Chin State milu nak in an tam deuh tung! A tulio vawleicung Ramkhel rian zong ah, khuazei ram hmanh ah, President/Prime Minister Rev. Dr. a nih, Vuanci (Minister) ah Rev. Dr. anih, MP ah Rev. Dr/ Pastor a nih tiah an tialmi an chim mi kan thei bal hnga lo?
Ramkhel riantuannak / MP i cuhnak ah Bible degree khi hman khawh a si maw?
Ramkhel rian cu vawlei lei rian a si i, Biaklei rian (Religion) cu Thlarau lei riantuannak a si. An i dang, an cawnmi le an awnmi zong aa dang lawlaw. An rian a umtuning hrimhrim aa dang tuk. Cucaah, Bible lei degree cu Ramkhel riantuannak/MP cuhnak caah an degree an hmang kho lo i hman phung zong a si lo. 2015 – 2020 karlak ah NLD in aa cuh i MP a hmumi Pu Nelson Siang Awr khi University of Rangoon (Secular-Valei lei) in M.A. a awng. Cu hnu ah Siangapore ram Trinity Theological College (South East Asia ram, Bible lei sianginn ah min ngei taktak a simi) in M.Th. a awng than. MP aa cuh lio ah a min pawng ah M.A., M.Th. tiah aa bunh nain, NLD zungpi lei nih M.Th. cu an hlawtpiak, biaknak lei degree a si caah, an pompiak lo. Hi hna zong hi i cawn awk a si, tiah ka ruah. (Biakarlak tenh: Vawleicung pumpi nih Dr. a nih an ti ahcun, siibawi – minung siibawi, saram siibawi le haa siibawi tinak a si. Vawlei lei fimnak in a thiam taktakmi thiamsang pawl nih university pakhatkhat in Ph.D. an awn hnu i rian an tuan tik zongah, cauk thatha a tial, a min a than ahcun, Dr. anih ti zong in an auh theu hna. Biaknak lei ahcun Dr. ti cu an hmang duh lo). Cucaah a fiang komi cu, Ramkhel riantuannak/MP i cuhnak ah Bible degree cu hman khawh a si lo, hman phung zong a si lo. Rev. Dr. anih ti zong in auh khawh a si lo. Pathian/Thlarau rian le Ramkhel rian zong cawhmoih phung a si lo.
–6–
Biakilh
Kawlram cu kan van a chia, a bik in Chinmi/Laimi. Cu hmanh ah Laitlang khuasa mi vialte kan si dih ko. Kawlram tlaihhrem uknak nih 1962 in 2015 tiang, kumpi kum 53 chung. Hi kum 53 chung ahhin ralkap nih an kan uk tik ah, ram thanchoter cu a chim in chim hlah. Zeitin in dah uknak chak ka tlaih peng khawh lai, timi miru le mihrokhrol lungput nih tho kholo in a kan nenh tuk caah, fimcawnnak lei ah vawleiri bak kan phan cang. Ramdang he pehtlai cu uktu mitlaihrem pawl nih an duh lo caah, thil chuahnak factory, a bik in manufacturing a rak um lo. A um chun zong (Kawl ralkap nih a ser chommi company/sehzung/aloh zung) nih anmah an minung pawl rian luhnak ah an rak hman. Mizapi caah a huap kho lo. Rammi zapi cu rian ngeilo kan si caah, mizapi le mizaran nih paw i cawmnak caah, kan har. Cu dirhmun nih a kan nenh tuk caah, Kawlram chung ah phungki an karh. Chin State ah pastor, evangelist, Khrifabu le Khrihfa phunzakip an karh. Chin State chungah a ngan bikmi institution cu Khrihfa biaknak a hung si. Cu ruangah Chin State ah Khrihfa cu kan si ko nain, Nominal Christian timi A Phungmen Khrihfa kan tam tuk. Pastor zong an tam tuk nain, tuukhal taktak pastor cu an tlawm tuk cang. Zatuak ah 80 hi cu mah pawcawmnak ah chunni an tla. Hi vialte thilchuak hi Kawl ralkap uknak nih a nenh tuk caah, aphi chuak a si. Azei ti awk a tha ti lo. Cu ruang ahcun dahkaw, pastor cheukhat nih ramkhel rian lei ah an i mer fom cu!
Khatlei ah ralkap uknak nih a kan nenh tuk caah, theipar tha a chuahpi ve. Mah cucu zei lei si loin (Kan pa Dr. Hoi Sang-CS (Civil Surgeon) nih Melbourne khua a rak kan tlawn lio ah a chim bang) Thang Sui, Mang Er le Khen Ngio hna hi thluachuah a kan petu an si. Anmah ruangah ramdang le ram thangcho a phanmi Chin/Lai mi (minung 200,000) kan um cang. Cu hna nih kan Chin/Lai mi an herh baunak ah thiltha tampi an tuah khawh cang. An tuah diam fawn cang. Hmailei ah an tuah rih lai. Zeitluk in dah a that? A ti!
Sihmanhseh, Kawlram lak ah a lung a fimthiang rih lomi cu Chin/Laimi kan i tel rih caah, hmailei ahcun kan lung a fim a hau cang. A lung a fim mi zong an um pah len cang. Kawlram um ko bu zong ah, ramdang a bikin Thlailand, Philippines hna ah cacawn a hau. Cawn lawng si loin thiam taktak zong a hau fawn. Cu hna ram cu vawleicung fimthiamnak dot ah World Class cu an si lo, Kawlram nak in tlawmpal te an i zia deuh. Nain, Cafir (tangka pek in midang tialter, midang ca va i copy, midang va hal hnu ah, cupa cunu kha ka hal, tiah min langhter duh loin um a hmang pah rihmi ram an si. Kha vialte kha cafir ah aa tel) lei ah min an ngei rih. Kawlram zong cu theihcia a si ko. Zakhat ah 90% khi cu kha bantuk a rak si kha, kan hnulei 1996 lio hrawnghrang ah Rangoon ah ka rak theih/ton bal. Atu belte hi ASSK nih zeitluk in dah a thlen cang, timi tu cu ka thei kho ti lo. (Thinlung aa thlennak ahcun, kan ziaza, kan lungput hrimhrim hi a a hram bik a si ko rua?)
Cucaah, careltu hawidawt, ka peh ti lai lo. A sau tuk sual lai. Kan theih a haumi cu: Ramkhel rian/ Ramrian le Biaknak cu aa then bakmi, cawhmoih kho lomi a si, tital hi cu kan lungchung ah um cio sehlaw a tha hnga lo maw? Vawleicung nih a pommi a si ko caah mu! A pom lomi nan um sual ahcun, Church and the State timi kongkau hi tampi na research a hau te lai. Nangmah na ruahnak kha na duhpoh in na ruah, na chim len
-7-
zongah, vawleicung pumpi nih zeitin in dah a pom timi nih khan tho kholo in a nenh te ko lai. Kaa lawm.
- Lai Len
10 July 2020
