West Lairam (Bangladesh) Lai miphun nih ramkulh (State) an halmi ah Bangladesh cozah he a voikhatnak i chawnhnak cu 2023 Sikpar 5 ah an rak ngei cang. 2024 Vuate 5 ah Bangladesh cozah le Kuki-Chin National Front (KNF) cu Peace Talk a voi hnihnak an ngei than lai.
Tlamtling tein biaruahnak an ngeih khawhnakhnga Khrihfabu le pumpak nih kan umnak hmun cio in thlacamnak in bawm cio hna usih, tiah Mizoram Bawm Students’ Association nih cathanh an chuah.
Hi kong he pehtlai in Brig. Gen. Mawia, Spokesman KNF/A, nih cun ‘ Bangladesh cozah he a voihnihnak Peace Talk kan ngeih ding mi ah tluangte in kan ngeih khawhnakhnga zapi nan thlacamnak kan herh ngai ko. A tutan 2nd Round Talk hi Bangladesh cozah lei in Home Ministry rianțuan palai dihlak an i tel lai. Kuki-Chin National Front Delegates hi minung 8 kan si i, keimah hi Team Leader ka si”.
‘ Kuki-Chin National Front le Bangladesh cozah kar ah kahdohnak fak caan a chuak i, zapi nih harnak fakpi an tong. Mizapi le KNF caah thiltha a um lai ruahchannak kan ngei’ tiah a chim.
