COVID-19 ai thawknak hmunhma asimi Wuhan khua cu biatak tein ramdang nih chekhlat ding a si tiah Australia cozah hruainak in an rak soksai ruang ah Australia cozah le Tuluk cozah karlak pehtlaihnak a chia lei a panhnak a sau ngai cang.
Kan hnu thla thawk ahkhan Tuluk cozah nih Australia lei in kuat mi sasen, wine le changreu..tbk a kuat chanh mi cu ngunkhuai pek ding ah a let in a sanh piak ruang ah Australia cozah nih ramhnih karlak chawlehnak ah Tuluk cozah namneh nak a kan tuah tiah an soisel.
November thla thawkka ahkhan Australia ram ah a um mi Tuluk Embassy nih cathanh an chuah mi chung ah Tuluk le Australia ram hnih karlak ah buainak a linhsat tertu thil phun 14 tiah thanhca a chuah.
Cu cathanh chung ah ai telmi a biapi in Australia ramchung ah Tuluk cozah nih phaisa hrambunh a tuah mi cu Australia cozah nih a kham leng ah Tuluk nih a tuah mi 5G Network zong luh a khamh timi aa tel. Hong Kong buainak zong ah Australia cozah nih ai pehtlai lo tuk mi aa telh tiah sual an phawt.
Nizaan nai te ah Tuluk cozah nih Twitter ah Australia ralkap pakhat nih Afhganistan ram hngakchia pakhat thah a timhnak timi hmantlak deu cu an tar. Hi kong he pehtlai in Tuluk cozah lei in ngaihthiam nan kan hal a herh tiah Australia cozah nih thanhca a chuah.
COVID-19 zawtnak ai thawk in Australia cozah le Tuluk cozah pehtlaihnak fak ngai in a rawk, November thla le nizaan nai thawk in ramhnih cozah karlak pehtlaihnak a chia lei a panh chin lengmang.
Source: BBC
