Australia ram Victoria khualipi Melbourne cu thaikip October 28 hin lockdown in ai hlitphuak ve canglai.
Melbourne khualipi ah June thla thawk in a hmasa bik COVID-19 mizaw an um lo ni a phan ve cang. Victoria ramkulh hi Australia ramchung ah COVID-19 zawtnak a laifang a rak si i, ram pumpi 90% hrawng an rak umnak a si. Minung 905 an thi.
Melbourne khualipi zong ni 111 chung lockdown ai huah i, khualtlawn khamnak, dawrkhar nak in caan sau pi chung a um. Nihin October 26 ahcun nawlngeitu hna nih hun than ding ah ready a si cang tiah an thanh.
Victoria Premier Daniel Andrews nih, “kan hnu zarhdongh tiang ah mizaw thar an um lo leng ah zawt cheknak tampi kan tuah khawh. A tu cu kan kutka kan hun khawh cang tinak a si” tiah a chim.
A luancia July thla ahkhan cun Victoria ramkulh chung ah nikhat mizaw 700 leng an kai lengmang. A tu ahcun state health dempartment nih mizaw thar kan hmu ti lo tiah an thanh.
Victoira mipi hna cu a tu bantukin mizaw thar hmuh tilonak kong ah an i lawm i, Social media cung ah #CovidVic ti mi le DoughnutDay tiah an lawmhnak an langhter cio hna.
Australia ram hi milu 25 million khuasaknak a si i, ramchung ah mizaw 27,500 nih COVID-19 zawtnak an i chawnh tiah thawng kan theih.
Source: BBC
