Rakhine ram i Arakan Army – AA kuttang a phan cang mi Kyaukdaw le Pauktaw khuapi hna i khrihfa pastor minung 6 le NGO rian tuan mi pakhat hna cu a luancia June thla thokka ah khan Arakan Army – AA nih an rak tlaih hna i nihin tiang pehtlaih khawh an si ti lo tiah theih a si.
“AA nih an tlaih hna nak hi a sau ngai cang.nihin tiang an rak luat kho rih lo.tlaih an ton ka in nihin tiang ah a ho hmanh kan pehtlai kho bak hna lo” tiah tlaih a tongmi hna he naihniam in a um mi pakhat nih Zalen ah a chim.
AA nih an tlaih mi pastor hna cu U Sanay Htun,U Zakun Ram Sein, U Than Hlaing, U Sein Thar Oo, U Khin Maung hna an si i NGO rian a tuan mi U Sein Hla Htun zong aa tel ve.
Hriamtlai phu a si mi hna nih a tu bantuk in a ruang um lo in Khrihfa pastor hna an tlaih mi hna hi biaknak dang upat piak lo a si caah tuah ding hrim hrim a si lo hi kong hi AA nih biatak tein an ruah than a hau tiah Sittwe khua um Chin pastor pakhat nih a chim.
“An tlaih hna timi hi thawngdik a si ko.kan mah zong nih kan theih ve. AA nih an tlaih mi hna hi zei ruang ah dah an tlaih hna timi hi a ho hmanh nih fiang in kan theih cio lo tikah chungkhar le biaknak lei zong lungre a thei.hriamtlai bu nih hin biaknaklei riantuan cu chimlo mi sawhsawh hmanh hi a sual lo ah cun tlaih phung a si lo.an ven him ding tu a si.a tu tlaih a tong mi vial te thlah than hna seh ti kan duh ko.cun hi hnu ah a tubantuk in AA nih thil tuah ti hna hlah seh ti kan duh.” tiin a chim.
Rakhine ram chung tamdeuh hi Buddish bia mi an si nain peng 17 chung ah a um ve mi Chin,Myo le Khami miphun hna hi Khrifa biaknak a bia mi an si ve hna.
