Rakhine ramkulh, Ann khuapi hrambunh Western Regional Command ah hriam le kuanzen a rak chan tu SAC Mi 17 vanlawng pakhat cu Nizan November 10,zaanlei slm 2:30PM tluk ah khan AA nih an kah i emergency in a ttum.
“Nizan zaanlei slm 2:30PM tluk ah khan MI 35 le Mi17 cu Ann khuapi i pumpululh tual ah an hung ttum i hriam le riahcaw an chiah hnu ah kahdohnak i hliam a tuar mi SAC ralbawi cheukhat an phurh hna i an kir than. AA nih an kah khawh mi hi Mi17 a si i hmun pakhat ah emergency in a ttum.” tiah Ann khuami pakhat nih Ayeyarwaddy Times ah a chim.
A tu bantuk in AA nih an kah mi Mi-17 raltuknak vanlawng cu Magway ramthen, Ngaphe peng, Supadaung khuate ah a um mi Phungki sianginn tual ah emergency in a ttum tiah theih a si i a mah he a ra tti mi vanlawng dang i an kir nak ding hmun a si mi Magway ah an ttum.
Ann khuapi i a um mi SAC Western Regional Command sakhaan pi cu AA nih caan sau lak te an tuk cang i a tu tiang ah a pawngkam sakhaan cheukhat cu an laak cang nain sakhaan pi taktak cu laak khawh a si rih lo.
AA nih hin Ann khuapi luhnak lampi vialte cu an phih viar cang caah SAC nih vulei in thazaang a bawm kho ti lo i Vanlawng hmangin hriam le thazaang, riahcaw a chanh tawn hna.
