NLD Chairman a rak tuan bal mi Brigadier General Thari Sithu Aung Shwe (1918-2017) hi a luancia 2017 August 13 ahkhan Yangon ah a rak thi. A mah hi Kawl ramkomh ramkhel ah voihnih cu a min a rak thang ngai te.
Ramkhel ah biatak in a hun i tel le mipi nih an theih hi, 1988 kum ah ramdaw ralkap hna nih an rak dirh mi NLD party he a rak i fonh i a cawlcang tiah theih a si bik. Cu hlan ah cun 1962 kum hlan deuh ahkhan Brigadier General rank in ramkhel ah a rak i tel bal ve.
Brigadier General Aung Shwe a thih ah hin kum 100 a tling i, Kawl Tatmadaw an rak dirh ka in a rak i tel mi hna lak ah a hnubik a tang mi a si. Amah hi 1960 kum ahkhan party tanhnak a ngei ti ruang ah a dang ralbawi pawl he pension an rak pek hna i, ambassador rian an rak pek.
1958 kum ahhin Brigadier General Aung Shwe hi Commander of Southern Command rian a rak tlaih lio a si i, cu lio ah cun Mandalay in ralbawi cheukhat pawl he aa-na-ting an rak i tim bal tiah theih a si.
Hi lio ahhin Clean-PHASAPALA le Stable-PHASAPALA phuhnih in an rak i then lio a si i, Clean-PHASAPALA kha Tatmadaw nih an rak zumh hna lo lio te a si. U Nu nih ramtang a zaam mi Communist pawl kha kir ding in a rak lemsoi hna ruang ah Tatmadaw he ai rem lo mi Communist pawl he Clean-PHASAPALA an i kawp tiah Tatmadaw nih an rak rem hna lo ti a si.
Hi lio ahhin Bigadier General Aung Shwe hi Stable-PSPL ah a rak um tiah record cheukhat nih an tial. Yangon khua ah a um ralkap zungzik lei in Brigadier General Maung Maung nih kha lio aa-na-ting ding kha a rak duh lo i, siamremhnak a rak tuah nain a rak ngah lo. A hnu ah U Nu nih a rem than hna i, an i rem lo nain Tatmadaw phu hnih an chuak sual lai tiah Yangon lei in aa-na-ting nak a chuah kha si ti a si.
Mandalay khua in a rak i thawh mi ralkap mawtaw 50 hrawng cu Yangon ah nawlngeihnak an rak chiahnak lai 1958 September 27 ah thawng an thanh hnu ah an rak kham khawh hna. Cu hnu cun ralkap nih thimnak cu tuanvo a rak lak i, tanh mi ngeih lo ding tiah General Ne Win nih nawl a rak chuah nain nawlngeih lo ruang ah tiah Brigadier General Aung Shwe cu pension an rak pek. Ralbawi cheukhat he 1961 kum ah an rak dinhter hna ti a si.
Brigadier General Aung Shew le a phu pawl nih hin 1960 kum ah U Nu party nih teinak a hmuh ahcun zeidah kan tuah lai tiah khua an khan mi kha General Ne Win nih a theih ca ah an dinhter hna ti zong ah thawng a rak chuak.
Ralkap nih uknak lak ti mi hi voikhat a can sual ahcun a hnu zong ah a cang lengmang ti mi phan ruang ah ralbawi cheukhat cu an rak ngamh lo nain, 1962, 1988 pawl ah a rak cang.
1988 kum ah cun U Aung Shwe cu ralbawi hlun pawl he ramkhel donhhlei cung an phan i, NLD party dirh in Chairman zong a rak tuan. U Aung Shwe cu 2017 August 13 ahkhan Yangon ah khan tar thih in a thi.
Source: BBC
