Paletwa peng Samee khua in Matupi lei panh in a rak kai mi Rakhine ralkap AA thazaang 100 tluk nih Matupi peng Lesin khuate le Walan khuate i khuami inn le dawr hna cu an boh i thilri an fir pin ah khuami zuat mi vok le ar zong an thah i duhpoah in an ei tiah thawng theih a si.
Cu lawng si loin Paletwa lei in a rak kai mi AA pawl a va dong tu Matupi khua um AA le Chin brotherhood zong nih an pal pah nak khuate i mizapi inn le dawr hna boh in zapi vok le ar an thah an ei ve tiah theih a si.
Aluancia June 16 thok in Paletwa peng Samee khua in a rak kai mi AA ralkap hna cu June 24 ah khan Matupi peng Lesin khuate an phan i khuami Pu Myint Soe cu a el ah an kah caah a el a rak kiak.cun a thaizing June 25 zong ah khua chung dawr le inn hna cu an boh i inn chung thilri hna cu duhpoh in an laak .
“Ruah lo piin kan khua cu an rak phan.voi dang zong a phan tawn mi an si ko caah zei hmanh ah khin kan rel lo kan um ko.cu tin kan khua mi Pu Myint Soe cu an kah i cu thok cun a him nak kawl in kan zaam cio.cu tin kan zaam hnu ah kan inn le lo,kan satil arva cu an duh poah in an laak ko hna,kan dawr thil hna zong a zapi in an laak viar hna,inn le lo zong an hrawh viar.”tiah Lesin khuami pakhat nih a chim.
Cutin Paletwa lei in a rak kai mi AA pawl a va dongtu Matupi khua umcia AA le Chin Brotherhood hna nih an pal pah nak Matupi peng Walanpi khuate cu an an hnursuan ngai ngai fawn.
“An rak rat lio ah hin Chin Brotherhood lei in CDF-Matupi Brigade 1 zong an i tel ko caah zei a si lem lo tiin kan um ko.khuachung an phaak in meithal an puah thluahmah caah kan zam viar i kan zam kar ah kan satil viarte an laak viar.” tiah Walan khuami pakhat nih a chim ve.
