591 Million Dollar A Si Mi Diamond Cu India Nih King Charles III Nih Kan Pe Than Seh Tiah An Duh.
===============================================
Charles III siangpahrang a van si a roh hlan ah vawlei cung ah a man a fak bik mi, an rak fiar mi,lungvar man sung ah a tel mi cu a kan pe than seh tiah namneh a huah.Mah lungvar cu British siangpahrang lu chin ah an ser mi a si nain a cheu nih cun cu lungvar cu an rak fiar mi a si caah an pek than awk a si an ti.
Queen Elizabeth II a thih tlawm pal ah Twitter ah “Kohinoor” ti mi biafang cu a leng vai chuah mah.Hi nih a timh mi cu British Colonialism lio i an rak tuah palh mi pawl kha ser siam than ding in an ti mi a si.
”Kohinoor” cu vawlei cung ah a tlang bik le a man a fak bik mi diamond pakhat a si i British siangpahrang lu chin lai fang ah a um mi a si.Mah diamond cu 105.6 carats a rit i 591 million dollar a phu mi a si.Natein cu diamond cu zei tin dah siangpahrang chungkhar sin ah a rak phak ti cu a cheu caah cun lung fahnak a si.Queen Elizabeth II a thih bak in cu diamond cu hma sa a rak ngeitu sin ah pek than ding in an ti chuah mah caah King Charles III nih zei tin dik a tawlrel te lai.
A tuan bia fiang fai cu theih a si ti lo nain cu diamond cu 1840 hrawng ah kum 10 long a rak si mi Maharajah Duleep Singh cu Britain’s East India company sin ah an rak up ter i 1850 ah Queen Victoria sin ah a rak phan.
Cu siangpahrang lu chin cu Queen Elizabeth II a nu nih a rak i chinh.Queen Elizabeth II nih a coronation ni 1953 ah a rak i chinh.Cu siangpahrang lu chin cu 2002 ah a hnu bik hmuh a rak si i a tu Queen Elizabeth II ruak kuang cung ah hmuh khawh a si.
Cu caah India community lei nih tu diamond cu pek than ding aw/ann cu a thang chin chuah mah.Queen Elizabeth II a thih 8 mins long a si rih nain India pa pakhat nih Twitter ah “India mi aiawh in kan “Kohinoor” cu kan pek than tiah a tial.Cu i a tang lei comment ah minung tam pi nih an dir kamh.
Mi dang pakhat nih cun “Queen nih cu diamond cu a nun lio ah India sin ah rak pek than ding a rak duh lo i a el kha philh a si rih lo.Cun a dang Twitter pakhat nih cun a tu ah hin “Kohinoor” cu kan ngah kho than cang lai maw.Queen Elizabeth II cu colonialism i hmel chunhnak sawh sawh long si lo in a mah kut neh a tel hrim hrim tiah a tial.
Jyoti Atwal New Delhi’s Jawaharlal Nehru University ah a tuan mi Historian pa nih ABC news ah King Charles III nih hin a hlan colonialism an rak tuah palh mi vial te hi a nawl hna a hau lai tiah a chim.
Professor Atwal nih” King Charles III nih anti-colonialism an tuah mi ruang ah a chuak mi thil pawl hi a hmai tonh hna hau lai” tiah a chim.
A si nain hi ban tuk in diamond pek than ding an hal cu a voi khatnak bik a si lo.Kum 2000 lio ah India politician pawl nih UK sin ah “Kohinoor” cu pek than ding in ca an rak tial bel.
India MP a rak si mi Shashi Tharoor nih Britian nih a kan bat mi a um tiah a rak tial bel.
“Nain a hlan a ngeitu sin ah pek than i timh lo in “Kohinoor” cu an siangpahrang nu a nu lu chin ah benh in Tower of London ah an tar ko”.
”Mah ti tuah sernak cu an mah colonialism lio i zah thei lo in mi an rak namnehnak hna le phung ning lo in thil chuh an rak hman ning kha a kan theih ter than tu a si.”2013 lio ah British Prime Minister David Cameron cu India a rak tlawn lio ah cu diamond pek ding cu a rak el hna.Hi ti hin a rak chim “kei mah nih (returnism) cu ka tlaih mi a si lo i ka rak i tlaih bel mi zong a rak si lo.Mah cun thil hman tuah ning cang a si ti zong in ka zum lo”.
A si nain cu diamond cu a rak ngeitu a thlen hi voikhat long a rak si lo caah India hi a ngeitu tak tak an si maw ti cu i ceih phai chuah mah mi a si.
Cu diamond cu kum thong tam pi lio ah rak hmuh cang mi a si i a rak ngei bel tu hna hi Mughals Afghans le Persians an rak si i cu hnu long cun Punjav Maharajah sin ah a rak phan.Cun a hnu bik ah British sin ah a rak phan mi a si.
Twitter a hmang tu pakhat nih cun “India nih ningzah thei lo in “Kohinoor” cu kan ta a si an ti ngam cu a mak ve.A hman ning chim ah cun cu diamond cu Lahore ah rak hmuh mi a si caah Pakistan ta a si tak tak mi a si lo maw tiah a tial.”
“A dang pakhat nih cun “Kohinoor” hi Afghanistan sin ah van ram kai duh ah cun a pek ding a si a ti.”
“A dang pakhat nih cun “a hman ning hei chim ko ah cun “Kohinoor” cu Parsian King a rak si mi Nadir nih ral ah a rak tei i a lak mi a si.Cu caah a mah nih a rak fiar ve.Cun British nih an rak fiar than.Hi diamond hi India ram chung ah an cawh i an hmuh mi a si tak tak ko cun kan pek than hna awk a si a ti.”
Cu diamond lu chin cu a ho nih a chinh than lai ti theih a si rih lo.Ruahnak chim ah cun Queen Consort a si mi Camilla nih King Charles III coronation ni ah a hruk men lai.Cun a mah dih in Kate Middleton nih Queen Consort a si in a hruk ve te men lai.
