2020 kum cu Kawl ramkomh chung zong ah zuamcawhnak ngan pipi le harnak phun zakip he a dih cuahmah. Vawleicung hrirai lianpi COVID-19 le kum 5 dan ah voikhat tuah mi ram pumpi thimnak zong Myanmar ramkomh nih a ton ve. Ramkhel, chawlehnak le thlennak phun kip he 2020 a liam cuahmah lio ah 2020 kum chung Kawl ramkomh ah thilcang a bikbik cheukhat chung in a cemcem kan hun langhter.
Asia Huap In Relkhawh Awk: 2020 Kum Chungah Vawlei Hnintu Asia Ramcang Hmanthlak Cheukhat
Kum 2 chung raltuk hnu ah remdaihnak cabuai cung ah AA hriamtlai le Tatmadaw
2018 kum dongh khan a rak i thawk i kum 2 khengte fak taktak in ral a rak i tu mi Rakhine miphun hriamtlai AA le Tatmadaw hna cu 2020 kum dih lai te ah remdaihnak cabuai cung an hung phan kho. Hihi Myanmar ramkomh thlenremhnak ah hmai a kal deuh mi thanchonak a si tiah chim khawh a si.
Thawnghram: AA Le Tatmadaw Online In Biaruahnak Kan Ngei Tiah AA Nih An Thanh
Myanmar Tatmadawle AA hriamtlai hna cu November 25 ahkhan online in tonnak an ngei. Online in an i caih mi chung ah 2020 ram pumpi thimnak chung ah thimnak tuah khawh lonak a si mi Rakhine ramkulh chung ah thimnak tuah khawh than ding le hartong mipi bawmhnak ca ah lam awn khawhnak, khat le khat kar zumhnak a feh khawhnak ding ca ah zuam ding timi kan i caih tiah AA lei nih thawng an thanh.
Relchap: Tatmadaw Le AA Tonnak An Ngei
December 9 ah cun Myanmar Tatmadaw le AA hriamtlai hna cu UWSA hmunpi ah hmaitonh tonnak an ngei kho. AA lei in an hruaitu ah Dr. Htun Nyi Aung le Tatmadaw lei in boyoke rank pawl an i tel kho tiah theih a si.
Kum hnih chung ral i tuknak ruang ah mipi chung in minung 200 leng an thi i, kaphnih lei in an tlaih mi minung 300 leng an kai. Asinain raltuknak hi dih ko hmanh sehlaw, NLD le Tatmadaw i hmaitthat ta loin Tatmadaw le tlangcung hriamtlai pawl remhdaihnak cu caan sau a nguh lai lo tiah ramkhel thiamsang hna nih an chim.
NLD nih Tlangcung mi he naihniam deuh in kar hlan hram thawk ai tim
2020 ram pumpi thimnak a dih ah teinak cotu NLD party nih a voikhatnak bik meeting ah tlangcung miphun party hna he rampi thlennak ca ah zuam ding timi biatung an chuah i, tlangcung miphun party pawl sawmnak ca a kuat hna. December 12 ahkhan NLD party palai minung 3 hna cu tlang miphun party pawl he biaruah ding ah rian an khinh hna.
NLD cozah nih a luancia cozah an tlaih chung ah phunghrampi dal 261 cu remh ding ah a rak doh i, a tu cozah thar zong ah remh lo ding in ai tim fawn. Asinain, Democracy ram sernak ca ah tiah tlangcung miphun party 48 hna cu sawmnak ca a kuat hna hi a si.
Hi kong he pehtlai in Rakhine miphun party in chimrelnak ngeitu Daw Aye Nu Sein nih cun, Ramkomh timi cu party pakhat nih a dihlak in uk ding timi maw a si, zapi te i tel timi dah a si ti mi an lungput hi zoh a hau tiah a chim. Tlangcung miphun party cheukhat hna nih cun NLD nih phunghram dal 261 hi a remh khawh ko nain a remh lo mi hi tlangcung miphun pawl kha central in tlaih peng a kan duh ca ah a si tiah an chim ve.
Myanmar Rampi Palik Taza A Cuai Ngam Tu Pa
Naypyidaw Wisdom Hill tualleng sianginn ah Victoria ti mi kum 3 tling lo hngakchia nute tlaihhrem a ton kong ah lunghrinh mi tiah tlaih a si mi Ko Aung Kyi cu biacaih zung nih a sual an hmuh lo ruang ah aluat i, a luat hnu ah Myanmar rampi Palik phu taza a cuai hna.
Relchap: Hngakchia Victoria Tlaihhrem Puh Mi Ko Aung Kyi Nih Palik Taza A Cuai Hna
December 8 ahkhan palik phu pi cu biacaih ding ah biahri a tirh hna i, zathlak man phaisa sing 5000 a hal hna. Myanmar ramkomh palik phu bawizik Aung Thein Win cu Ko Aung Kyi nih a minkhenh in taza a cuai i, biacaih zung ah an chuak lai. Ko Aung Kyi hi Wisdom Hill tualleng sianginn driver a si i, palik nih lunghrinh mi sual tuahtu tiah taza an cuai i, 2019 December 18 ahkhan a luat mi a si.
Buddhist Ralhrang Tiah Kawh mi Wirathu Phungki pa Palik Sinah Ai Ap
Tlaih ding ah thawngthanh mi Kawl phungki pa U Wirathu cu kumkhat chung ai thuh nawh hnu ah Yangon ramthen nitlaklei palik zung ah December 2 ahkhan a rak i ap. Kawl miphun dawtnak a dir pitu U Wirathu hi ai thuh hnu kumkhat 2020 rampi thimnak lai zarhkhat ah a rak i tlaihter hi a si.
U Wirathu hi 2019 kum April 29 ahkhan Myeik khua ah tuah mi 2008 phunghram 59 (g) remh lo ding duh langhternak ah Rampi ruahnak petu Daw Aung San Suu Kyi cu fai ngaingai in a rak soisel. Cu a dih May 5 zong ah Yangon khua ah tuah mi 2008 phunghram 59 (g) duh langhternak le 261 remh duh langhternak zong ah U Wirathu nih ralkap hi pathian bantukin biak ding an si tiah a rak chim.
Rampi mualphohnak le thangchiatnak Biacaihnak dal 124 (a) in biacaihnak ding ah auh a si mi U Wirathu hi a sual hmuh a si ahcun thong kum 25 in kum 14 tiang thlak khawh a si tiah phunglam thiam hna nih an chim.
Ziknawh Commision Chairman U Aung Kyi A Rian Ai Phuak
Kawl ramkomh chung ah ziknawh eihmuar dohnak Anti-corruption Commsion Chairman a si mi U Aung Kyi cu a rian in December 1 ahkhan ai phuak tiah ziknawh eihmuar dohnak phu nih an thah. Cozah tlaitu NLD nih an cozah tlaih caan a donhnak thla 4 lawng ai duh mi ah U Aung Kyi a rian ai phuah hi mi khuaruah a har ter cio.
U Aung Kyi hi general rank in retired a la mi ralkap chuak a si. 2017 kum November thla khan ziknawh eihmuar dohnak phu ah chairman rian a rak tlai. A mah nih ziknawh eihmuar dohnak phu a tlaih hnu in ramchung ah Chief Minister pawl ziknawh eihmuar ruang rianphuahnak ai chap deuh tiah hmuh khawh a si. Asinain, ruah lo piin a rian aa phuah mi kong ah zeiset hngalh a si lo i, ram mipi an khuaruah a har cio.
Source: BBC
